শংকৰ চাহ বাগিছাৰ অপহৰণ কাণ্ডৰ আঁৰত আলফা স্বাধীন

দীৰ্ঘ সময় বিৰতিৰ পাচত ৰাজ্যত পুনৰ নিষিদ্ধ ঘোষিত বিদ্ৰোহী সংগঠন আলফা স্বাধীনে সংঘটিত কৰিলে অপহৰণ কাণ্ড ৷ শুকুৰবাৰে সন্ধিয়া ৬ বজাত তিনিচুকীয়া জিলাৰ তালাপ আৰক্ষী চকীৰ অন্তৰ্গত শংকৰ চাহ বাগিছাৰ কলঘৰত প্ৰৱেশ কৰে সামৰিক পোছাক পৰিহিত এটা চাৰিজনীয়া অস্ত্ৰধাৰী যুৱকৰ দল ৷ বাগিচাৰ পৰিচালকক নোপোৱাত বাগিচাখনৰ কলঘত মুখ্য ফিটাৰ হিচাপে কৰ্মৰত গৌৰাংগ সুন্দৰ দেৱ নামৰ কৰ্মচাৰীজনক অস্ত্ৰধাৰী যুৱকৰ দলটোৱে নিজকে আলফা স্বাধীন বুলি পৰিচয় দি অপহৰণ কৰি লৈ যায় ৷ কলঘৰৰ CCTV কেমেৰাত বন্দী হৈছে অপহৰণৰ সমগ্ৰ দৃশ্য ৷ এই ঘটনা সংঘটিত হোৱাৰ পিচতেই সমগ্ৰ অঞ্চলটোত আতংকৰ সৃষ্টি হয় ৷ ইপিনে ঘটনাৰ খবৰ লাভ কৰাৰ লগে লগেই তিনিচুকীয়া আৰক্ষী অধীক্ষক শিলাদিত্য চেতিয়াই বৃহৎ সেনা-আৰক্ষীৰ দল লৈ ঘটনাস্থলীত উপস্থিত হৈ অস্ত্ৰধাৰী যুৱকৰ দলটোৰ বিৰুদ্ধে তীব্ৰ অভিযান আৰম্ভ কৰে ৷ কিছুদিন পূৰ্বে জিলাখনত আলফাৰ দুধৰ্ষ নেতা ৰূপম অসমৰ নেতৃত্বত আলফাৰ চাৰিজনীয়া এটা দল বিচৰণ কৰি ফুৰাৰ তথ্য লাভ কৰিছিল সেনা-আৰক্ষীয়ে ৷ এই অপহৰণ কাণ্ডটো আলফাৰ দলটোৱে সংঘটিত কৰা বুলি নিশ্চিত হৈছে সেনা-আৰক্ষী ৷ অপহৰণ কাণ্ড সংঘটিত হোৱাৰ পিচতে বাগিচাৰ শ্ৰমিক সকলৰ মাজত তীব্ৰ আতংকই বিৰাজ কৰিছে ৷ শ্ৰমিক সকল শংকিত হৈ পৰাত শনিবাৰে দিনটোত স্তব্ধ হৈ পৰিছে বাগিছাখনৰ কাম-কাজ ৷ ইফালে অপহৃত গৌৰাংগ সুন্দৰ দেৱৰ পত্নী,কন্যাই শংকিত হৈ শোকত ভাগি পৰিছে ৷ দীৰ্ঘ সময় বিৰতিৰ পিচত নিষিদ্ধ ঘোষিত বিদ্ৰোহী সংগঠন আলফা স্বাধীনে ২০১৯ চনত প্ৰথমটো অপহৰণ কাণ্ড সংঘটিত কৰিছে জিলাখনত ৷ বিদ্ৰোহী সংগঠনটোৰ বিৰুদ্ধে তিনিচুকীয়া আৰক্ষী,শদিয়া জিলা আৰক্ষী আৰু ভাৰতীয় সেনাই তীব্ৰ অভিযান অব্যাহত চলাইছে যদিও বৰ্তমানলৈকে অপহৃত গৌৰাংগ সুন্দৰ দেৱক আলফাৰ কৱলৰ পৰা মুক্ত কৰিবলৈ সক্ষম হোৱা নাই ৷