ঘৰৰ ভিতৰত আৱদ্ধ কৰি অকথ্য নিৰ্যাতন চলালে দুই মহিলাৰ ওপৰত ! - physical harassment
প্ৰথমে ৰং নম্বৰত চিনাকি, তাৰ পাচত যুৱক-যুৱতীৰ মাজত প্ৰেম ৷ যেতিয়া প্ৰেমে চূড়ান্ত ৰূপ ল'লে ৰং নম্বৰত চিনাকি হোৱা যুৱকৰ সৈতে পলাই গ'ল যুৱতী ৷ ৰং নম্বৰত চিনাকী হোৱা প্ৰেমিকে সোমবাৰে কলগাছিয়াৰ ডিমাপুৰ গাঁৱৰ যুৱতীগৰাকীক পলুৱাই আনি ৰাখিছিল লাচাংগা গাঁৱৰ এগৰাকী মহিলাৰ ঘৰত ৷ কিন্তু ৰাতিটো থকাৰ পাচতেই যুৱতীগৰাকীক তাতে এৰি অন্তৰ্ধান হ'ল যুৱক ৷ উপায়হীন হৈ পৰিল যুৱতীগৰাকীৰ লগতে আশ্ৰয় দিয়া দুয়োগৰাকী মহিলা ৷ মঙলবাৰে সন্ধিয়া যুৱতীগৰাকীক ডিমাপুৰ গাঁৱৰ পিতৃৰ ঘৰত থ'বলৈ যায় মহিলাগৰাকীৰ লগতে তেওঁৰ ননদ ৷ কিন্তু হিতে বিপৰীত হে হ'ল পৰিস্থিতি ৷ যুৱতীৰ পৰিয়ালে মহিলা দুগৰাকীক বন্দী কৰি নিৰ্মমভাৱে শাৰীৰিক অত্যাচাৰ চলায় ৷ স্থানীয় ৰাইজে এই ঘটনাৰ বিষয়ে জানিব পাৰি মহিলা দুগৰাকীক উদ্ধাৰৰ চেষ্টা চলাই যুৱতীগৰাকীৰ ঘৰ লণ্ড-ভণ্ড কৰে ৷ অৱশেষত কলগাছিয়া আৰক্ষী ঘটনাস্থলীত উপস্থিত হৈ পৰিস্থিতি নিয়ন্ত্ৰণ কৰাৰ লগতে মহিলা দুগৰাকীক উদ্ধাৰ কৰে ৷