চাপৰত কাঠৰ কুণ্ডাসহ কাঠ ফলা মেচিন জব্দ
পূৱ বিলাসীপাৰাৰ চাপৰৰ ৰৌমাৰীস্থিত ৰেশমী এণ্টাৰপ্ৰাইজ নামৰ এটা কাঠফলা মিলত বন বিভাগৰ অভিযান । এই অভিযানত জব্দ হ'ল কাঠফলা মেচিন আৰু কাঠৰ কুণ্ডা । কাঠৰ মিলটো মোহিবুল হক নামৰ এজন ব্যৱসায়ীৰ বুলি জানিব পৰা গৈছে । জব্দ কৃত কাঠৰ কুণ্ডাবোৰৰ আনুমানিক বজাৰ মূল্য লক্ষাধিক টকা হ'ব । মিলটো বন বিভাগৰ অনুমতিপ্ৰাপ্ত যদিও চৰকাৰী নিৰ্দেশনা অৱমাননা কৰা অভিযোগ উত্থাপন কৰা হৈছে । সোমবাৰে কাঠৰ কুণ্ডাখিনি জব্দ কৰাৰ লগতে কাঠফলা মেচিন বহলপুৰ বন বিভাগৰ কাৰ্যালয়লৈ নিয়ে বন বিভাগৰ লোকে । সম্প্ৰতি বন বিভাগে এই সন্দৰ্ভত তদন্ত অব্যাহত ৰাখিছে । উল্লেখ্য যে, ধুবুৰী জিলাত ইয়াৰ পূৰ্বে অবৈধভাৱে চলাই থকা কাঠফলা মিল বন বিভাগে জব্দ কৰিছে । কিন্তু ইয়াৰ পাছতো একাংশ অসাধু ব্যৱসায়ীয়ে চোৰাং কাঠৰ বেহা অব্যাহত ৰাখিছে ৷