ভাৰত শান্তিৰ পূজাৰী যদিও আগ্ৰাসন সহ্য নকৰে: ৰাজনাথ সিং - Arunachal pradesh

"ভাৰতে কোনো চুবুৰীয়া দেশৰ লগত শত্ৰুতা নকৰে আৰু যদি কোনোবাই কৰে, সেইয়া সহ্য কৰা নহ’ব ৷ ভাৰত শান্তিৰ পূজাৰী ৷ যদি কোনোবাই অনুপ্ৰৱেশ কৰিব বিচাৰে তাৰ ধৰণে উচিত প্ৰত্যুত্তৰ দিয়া হ'ব ৷" এই মন্তব্য দেশৰ প্ৰতিৰক্ষা মন্ত্ৰী ৰাজনাথ সিঙৰ ৷ বৃহস্পতিবাৰে অৰুণাচল প্ৰদেশৰ কিমিনৰ আই টি বি পি(ITBP)ৰ ১০ ম বেটেলিয়ানৰ মূখ্য কাৰ্যালয়ৰ পৰা ৰিমৰ্ট যুগে কিমিন-পতিং, এপ্ৰচ ৰোড লোহিত, বালিপৰা-চাৰিদুৱাৰ, টাৱাঙকে ধৰি মুঠ 12 টা সীমান্তৰ পথ দেশৰ নামত উচৰ্গা কৰি এইদৰে মন্তব্য কৰে দেশৰ প্ৰতিৰক্ষা মন্ত্ৰী ৰাজনাথ সিঙে ৷ ইয়াৰ ভিতৰত 10 টা সীমান্ত পথ অৰুণাচল প্ৰদেশৰ, 1 টা লাডাখ আৰু আনটো জম্মু -কাশ্মীৰৰ ৷ বৃহস্পতিবাৰে কিমিনৰ 20 কিলোমিটাৰ দৈঘ্যৰ বৰ্ডাৰ ৰোডছে নিৰ্মাণ কৰা পথটো নিজ হাতে ফিটা কাটি মুকলি কৰে প্ৰতিৰক্ষা মন্ত্ৰী ৰাজনাথ সিঙে ৷ ইয়াৰ পাছতে ভাষণ প্ৰসংগত সিঙে কয় যে,উত্তৰ পূৰ্বাঞ্চলক প্ৰধান মন্ত্ৰী নৰেন্দ্ৰ মোদীৰ নিৰ্দেশ মতে প্ৰতি মাহে এজন কেন্দ্ৰীয় মন্ত্ৰীয়ে পৰিদৰ্শন কৰিব ৷ যাৰ বাবে আজিৰ সময়ত এই উন্নয়ন সাধন কৰিব পৰা গৈছে আৰু বৰ্ডাৰ ৰোডছে সমগ্ৰ ভাৰতৰ লগতে উত্তৰ পূৰ্বাঞ্চলৰ অৰুণাচল প্ৰদেশৰ বহুতো পথ সুগম কৰি তুলিছে ৷ উক্ত অনুষ্ঠানত উপস্থিত থাকে কেন্দ্ৰীয় ক্ৰীড়া মন্ত্ৰী কিৰেন ৰিজিজু, অসমৰ মুখ্যমন্ত্ৰী ড৹ হিমন্ত বিশ্ব শৰ্মা, অৰুণাচল প্ৰদেশৰ মুখ্যমন্ত্ৰী পেমা খাণ্ডু আৰু চিফ অৱ ডিফেঞ্চ ষ্টাফ বিপিন ৰাৱাট ৷