মাছ ধৰিবলৈ গৈ বন্যহস্তী আক্ৰমণত মৃত্যু এজনৰ - One killed in wild elephant attack

ৰাজ্যত অব্যাহত আছে হাতী-মানুহৰ সংঘাত ৷ এইবাৰ দিহিং পাটকাই ৰাষ্ট্ৰীয় উদ্যানৰ অন্তৰ্গত চৰাইপুং বনাঞ্চলত মাছ ধৰিবলৈ গৈ বন্যহস্তী আক্ৰমণত মৃত্যু হ'ল এজন লোকৰ ৷ প্ৰাপ্ত খবৰ মতে, শনিবাৰে দুপৰীয়া চৰাইপুং ৰেঞ্জৰ অন্তৰ্গত 2 নং কঁঠালগুৰি গাঁৱৰ বাসিন্দা পদ্মেশ্বৰ সোণোৱাল নামৰ 45 উৰ্ধৰ ব্যক্তি এজনে সহযোগী দুজনৰ সৈতে মাছ ধৰিবলৈ বুলি চৰাইপুং বনাঞ্চলৈ গৈছিল ৷ কিন্তু দুৰ্ভাগ্যজনকভাৱে ঘৰলৈ উভতি অহাৰ অৱস্থাত বিচৰণ কৰি থকা বন্যহস্তী এজাকৰ সৈতে মুখা-মুখি হয় লোককেইজন ৷ লগে লগে বন্যহস্তীৰ জাকটোৱে ব্যক্তি কেইজনৰ ওপৰত আক্ৰমণ চলায় ৷ আক্ৰমণত পদ্মেশ্বৰ সোণোৱাল নামৰ ব্যক্তিজন থিতাতে নিহত হোৱা লগতে আন দুজন ব্যক্তিৰ কথমপি প্ৰাণ ৰক্ষা পৰে ৷