পাৰিতোষিত নাপাই চুৰিকাৰ্যত লিপ্ত হ’ল ঘাইপথ সম্প্ৰসাৰণ কোম্পানীৰ কৰ্মচাৰী - ৰাষ্ট্ৰীয় ঘাইপথ সম্প্ৰসাৰণ কোম্পানী
উদক ভেটা ৰখীয় পতাৰ দৰেই ঘটনা সংঘটিত হ’ল যোৰহাটত ৷ সামগ্ৰীৰ নিৰাপত্তাৰ দায়িত্বত থকা কৰ্মচাৰীয়েই লিপ্ত হ’ল চুৰিকাৰ্যত ৷ এই ঘটনা সংঘটিত হৈছে যোৰহাটৰ পৰা জাঁজী লৈ চলি থকা ৰাষ্ট্ৰীয় ঘাইপথ সম্প্ৰসাৰণ কোম্পানীৰ কেম্পত । চাৰিলাইন যুক্ত ৰাষ্ট্ৰীয় ঘাইপথ সম্প্ৰসাৰণৰ অস্থায়ী কেম্পত পথ নিৰ্মাণৰ সামগ্ৰী চুৰি কৰি লাহদৈগড় আৰক্ষীৰ জালত পৰিল কেম্পৰে নিৰাপত্তাৰ দায়িত্বত থকা চাৰি যুৱক । আটকাধীন যুৱক কেইজন হ'ল ৰমেন কলিতা, অঞ্জন বৰা, জ্ঞানদ্বীপ হাতীবৰুৱা, সুদীপ্ত বৰুৱা ৷ দুখন বাইকেৰে নিৰ্মাণ কাৰ্য্যত ব্যৱহাৰ হোৱা বহু পৰিমাণৰ লোৰ সামগ্ৰী চুৰি কৰি আনোতে তহলদাৰী লাহদৈগড় আৰক্ষীৰ এটা দলে আৰক্ষী চকীৰ নিচেই কাষৰে পৰা কৰায়ত্ব কৰে যুৱক কেইজনক। ইয়াৰ লগতে চুৰি কৰা লোৰ সামগ্ৰীসমূহ বিক্ৰী কৰা কাকজান মাজগাঁৱৰ এটা ডেম্পৰ গৰাকী আব্দুল কাদিৰৰ পুত্ৰ নেকিবুৰ ৰহমানকো আটক কৰি ন্যায়িক জিম্মালৈ প্ৰেৰণ কৰে ।