অভয়াপুৰীত সন্দেহজনক বাৰ্মিজ চুপাৰি জব্দ

ড্ৰাগছৰ লগতে বিভিন্ন ধৰণৰ অনৈতিক কাৰ্যকলাপৰ বিৰুদ্ধে কঠোৰ হৈছে অসম আৰক্ষী । এইবাৰ বাৰ্মিজ চুপাৰি বিচাৰি চলিল আৰক্ষীৰ অভিযান । বঙাইগাঁও জিলাৰ অভয়াপুৰীৰ চৌটাকীস্থিত এটা গুদামত জব্দ প্ৰায় ৯২ টন সন্দেহজনক বাৰ্মিজ চুপাৰি । এক গোপন খবৰৰ ভিত্তিত আৰক্ষীয়ে অমিত হৰললকাৰ নামৰ এজন লোকৰ গুদামত চলাইছিল অভিযান । কাৰ্যবাহী দণ্ডাধীশৰ উপস্থিতিত গুদাম ঘৰটো ছীল কৰা হৈছে । আৰক্ষীয়ে জনোৱা মতে, চুপাৰিৰ নমুনা সংগ্ৰহ কৰি সীমা শুল্ক বিভাগলৈ পৰীক্ষাৰ বাবে প্ৰেৰণ কৰা হৈছে । পৰীক্ষাৰ ফলাফলৰ পাচতহে চুপাৰি খিনিৰ সঠিক তথ্য লাভ কৰিব পৰা যাব বুলিও আৰক্ষীয়ে জানিবলৈ দিয়ে ৷