ইটিভি ভাৰতৰ হায়দৰাবাদস্থিত মুখ্য কাৰ্যালয়ত ৰঙালীৰ উছাহ

আমাৰো আছে মন ৷ আমাৰো আছে হৃদয় ৷ প্ৰতিটো মুহুৰ্তত দাঁৰৰ বাতৰি পাঠক অথবা দৰ্শকৰ মাজত দি থকা সংবাদ মাধ্যমৰ কৰ্মীসকলৰো আছে এটা সাংস্কৃতিক মন ৷ আছে মন ৰঙালীৰ দিনটোত পৰিয়ালৰ সৈতে এপাক নাচিবলৈ ৷ কিন্তু কৰ্তব্যৰ খাতিৰত এনেসমূহ উৎসৱৰ সময়ত হ'ব পৰা যিকোনো জৰুৰীকালীন বাতৰি প্ৰকাশ অথবা সম্প্ৰচাৰ কৰিবৰ বাবে সাজু থাকিবলগীয়া হয় ছপা অথবা বৈদ্যুতিন মাধ্যমৰ সংবাদ কৰ্মীসকল ৷ সংবাদ কৰ্মীসকলৰ এনে কৰ্ম ব্যস্ততাৰ মাজতে ইটিভি ভাৰত অসমৰ সংবাদ কৰ্মীসকলে হায়দৰাবাদস্থিত মুখ্য কাৰ্যালয়তে পালন কৰিলে হেঁপাহৰ ৰঙালী বিহু ৷ এনে বিহুৰ বতৰত কোনেনো থাকিব পাৰে ৰৈ ! সেয়েহে মুখ্য কাৰ্যালয়ৰ বাকৰিতে এপাক নাচিলে সংবাদ কৰ্মীসকলে ৷ অসমৰ বাপতি সাহোন ৰঙালী বিহুটি নাপাতি কেনেকৈ থাকে ৷ ঘৰলৈ গৈ আপোনজনৰ লগত এপাক নাচিব নোৱাৰিলেও কোনো ক্ষোভ নাই এইসকল সংবাদকৰ্মীৰ ৷ কিয়নো সত্যনিষ্ঠ সংবাদ প্ৰেৰণ কৰাৰ বাবে আমি যে সদায় দায়বদ্ধ ৷ এই সুযোগতে সমূহ অসমবাসী ৰাইজলৈ ইটিভি ভাৰতৰ তৰফৰ পৰাও জনালো অসমীয়া নৱবৰ্ষ তথা ৰঙালী বিহুৰ হিয়াভৰা শুভেচ্ছা ৷