UPSC ৰ অসম কেডাৰত কাম কৰাৰ ইচ্ছা আৰণ্যক শইকীয়াৰ

লোকসেৱা আয়োগৰ চূড়ান্ত পৰীক্ষাত সৰ্ব ভাৰতীয় পৰ্যায়ত 59 তম স্থান দখলেৰে অসমলৈ গৌৰৱ কঢ়িয়াই আনিছে, অসম আৰক্ষীৰ প্ৰাক্তন সঞ্চালক প্ৰধান কুলধৰ শইকীয়াৰ পুত্ৰ আৰণ্যক শইকীয়াই ৷ এই ফলাফলক যথেষ্ট সন্তুষ্ট বুলি উল্লেখ কৰে আৰণ্যক শইকীয়াই ৷ কঠোৰ অধ্যৱসায়ৰ বাবেই ভৱাৰ দৰেই পৰীক্ষাত ফলাফল দেখুৱাবলৈ সক্ষম হৈছে বুলি জানিবলৈ দিয়ে আৰণ্যক শইকীয়াই ৷ বিভিন্ন সমস্যা আৰু প্ৰত্যাহ্বানৰ মাজতো এই সফলতা অৰ্জনৰ ক্ষেত্ৰত আৰণ্যক শইকীয়াক তেওঁৰ পিতৃ-মাতৃৰ লগতে, বন্ধুবৰ্গ আৰু শুভাকাংক্ষীয়ে যথেষ্ট সাহস প্ৰদান কৰিছে বুলি উল্লেখ কৰে ৷ উদ্যমী যুৱকগৰাকীয়ে তেওঁৰ সফলতাৰ আঁৰত থকা প্ৰতিগৰাকী লোককে ধন্যবাদ তথা কৃতজ্ঞতা জ্ঞাপন কৰে ৷ বৰ্তমান ভাৰতীয় আৰক্ষী সেৱাৰ, কৰ্ণাটক কেডাৰৰ বিষয়া হিচাপে কৰ্মৰত আৰণ্যক শইকীয়াই আগন্তুক দিনত দেশৰ লগতে ৰাজ্যৰ হকে সেৱা আগবঢ়াই যাব বুলি উল্লেখ কৰে ৷ লগতে অতি শীঘ্ৰেই তেওঁ অসম কেডাৰত ভাৰতীয় প্ৰশাসনিক বিষয়া হিচাপে যোগদান কৰিব পাৰিব বুলি আশা প্ৰকাশ কৰিছে ৷