Jonai News: ৰাজাখানা পঞ্চায়ত কাৰ্যালয় ভাঙিলে যুৱকে

জোনাই, ৩ ছেপ্টেম্বৰ:মুৰ্কংচেলেক উন্নয়ন খণ্ডৰ অন্তৰ্গত ৰাজাখানা গাঁও পঞ্চায়তৰ ২৪ খন খিৰকি আজি পুৱা এজন যুৱকে শিলগুটিৰে ভাঙি চুৰ-মাৰ কৰে । উল্লেখ্য যে জোনবৰ গাঁৱৰ অজিত পেগুৰ পুত্র পুলিন পেগুৱে পুৱা ৰাজাখানা গাঁও পঞ্চায়তত প্ৰবেশ কৰি এফালৰ পৰা এখন এখনকৈ ২৪ খন খিৰকি ভাঙি পেলায় । স্থানীয় ৰাইজে প্ৰত্য়ক্ষ কৰি প্ৰতিৰোধৰ বাবে চেষ্টা কৰে যদিও যুৱকজন মানসিকভাৱে ভাৰসাম্য়হীন হোৱাৰ ফলত কোনেও প্ৰতিৰোধ কৰিব নোৱাৰিলে বুলি সদৰী কৰে স্থানীয় ৰাইজে ।

ইফালে,পঞ্চায়তখনৰ এনে অৱস্থা দেখি সভাপতি আৰু সম্পাদকে মূৰে কপালে হাত দিছে । নতুনকৈ নিৰ্মাণ কৰা পঞ্চায়ত কাৰ্যালয়টো সম্পূর্ণভাৱে নিৰ্মাণ কৰি ৰাইজক প্ৰদান কৰিছিল । কিন্তু মানসিকভাৱে ভাৰসাম্য়হীন পুলিন পেগুৱে এনেদৰে ভাঙি চুৰ-মাৰ কৰি পেলোৱাক লৈ স্থানীয় ৰাইজে দুখ প্ৰকাশ কৰিছে । পিছত পঞ্চায়ত কৰ্তৃপক্ষই জোনাই আৰক্ষী থানাত পুলিনৰ বিৰুদ্ধে এজাহাৰ দাখিল কৰে ।