সৰুক্ষেত্ৰীত মেলা চাই ঘৰলৈ উভতি অহাৰ পথত কিশোৰীক এচিডেৰে আক্ৰমণ যুৱকৰ - Youth attacked with acid by minor girl

বৰপেটা, 22 নৱেম্বৰ :সৰুক্ষেত্ৰীৰ গোমিৰ পথাৰ গাঁৱত চাঞ্চল্যকৰ ঘটনা ৷ মেলা চাই ঘৰলৈ উভতি অহাৰ পথত এগৰাকী কিশোৰীক এচিডেৰে আক্ৰমণ কৰে এজন যুৱকে ৷ আহত কিশোৰীগৰাকীক প্ৰথমে বৰপেটা মেডিকেল কলেজ হাস্পতাললৈ নিয়া হয় যদিও পিচত জি এম চি এইচলৈ প্ৰেৰণ কৰা হয় ৷ মঙলবাৰে নিশা প্ৰায় 8 বজাত এই ঘটনা সংঘটিত হৈছে বুলি জানিব পৰা গৈছে ৷

স্থানীয় ৰাইজৰ ভাষ্য অনুসৰি, সৰুক্ষেত্রীৰ ফজু বজাৰত অনুষ্ঠিত বাণিজ্য মেলা চাই বায়েকৰ সৈতে ঘৰলৈ উভতি অহাৰ পথতে কিশোৰীগৰাকীৰ শৰীৰত এচিড ঢালি দিয়ে যুৱকে ৷ লগে লগে চিঞৰ-বাখৰ কৰাত ঘটনাস্থলীত স্থানীয় ৰাইজ উপস্থিত হৈ কিশোৰীগৰাকীক চিকিৎসালয়লৈ প্ৰেৰণ কৰে ৷

ইফালে এই সমগ্ৰ ঘটনাৰ লগত সৰুক্ষেত্রীৰ কয়াকুছি আৰক্ষী থানাৰ অন্তৰ্গত চকিৰ ভিঠা গাঁৱৰ ৰফিজুল ইছলাম নামৰ যুৱকজন জড়িত আছে বুলি অভিযোগ কৰে ভুক্তভোগী কিশোৰীগৰাকীৰ পৰিয়ালে ৷ আনহাতে সমগ্ৰ ঘটনাৰ সন্দৰ্ভত আৰক্ষীয়ে বৰ্তমানেও তদন্ত অব্যাহত ৰাখিছে ৷

লগতে পঢ়ক:যশস্বী কণ্ঠশিল্পী পুলক বেনাৰ্জীলৈ "হাউলী বঁটা ২০২৩"