Wild Elephant Died: ৰঙাপৰাত বোকাৰ মাজত আৱদ্ধ বনৰীয়া হাতীৰ মৃত্যু - বোকাৰ মাজত আৱদ্ধ বনৰীয়া হাতীৰ মৃত্যু

ৰঙাপৰা, ২৫ ছেপ্টেম্বৰ:ৰঙাপৰাৰ ফুলবাৰীত আঘাতপ্ৰাপ্ত অৱস্থাত বোকাৰ মাজত আবদ্ধ হৈ থকা দঁতাল বনৰীয়া হাতীটোৱে অৱশেষত মৃত্যুক সাৱটি ল’লে ৷ দেওবাৰে নিশা আঘাতপ্ৰাপ্ত বনৰীয়া হাতীটোৰ মৃত্যু ঘটাত স্থানীয় ৰাইজে গভীৰ শোক প্ৰকাশ কৰিছে । উল্লেখ্য যে, বিগত প্ৰায় ৫ দিন ধৰি ৰঙাপৰা ফুলবাৰী চাহ বাগিচাৰ ১৩ নং শাখাত দঁতাল বনৰীয়া হাতীটো বোকাৰ মাজত আঘাতপ্ৰাপ্ত হৈ পৰি আছিল ।

গুৰুতৰভাৱে আঘাতপ্ৰাপ্ত হৈ চাহ বাগিচাৰ মাজৰ হোলাত পৰি থকা বনৰীয়া হাতীটোৱে উঠিবলৈ বাৰে বাৰে চেষ্টা কৰি ব্যৰ্থ হৈ অৱশেষত উঠিব পৰা শক্তিকণ হেৰুৱাই পেলাইছিল । জানিব পৰা মতে, আঘাতপ্ৰাপ্ত বনৰীয়া হাতীটোৱে খাদ্য গ্ৰহণ নকৰাত ক্ৰমান্বয়ে দুৰ্বল হৈ পৰিছিল । আঘাতপ্ৰাপ্ত বনৰীয়া হাতীটোক আমাৰিবাৰী বনাঞ্চলিক কাৰ্যালয়ৰ বন বিভাগে চিকিৎসা প্ৰদানৰ ব্যৱস্থা কৰিছিল যদিও হাতীটো সুস্থ কৰি তুলিব নোৱাৰিলে ।

আজি পুৱা ১০ বজাত ৰঙাপৰা পশু চিকিৎসালয়ৰ চিকিৎসক প্ৰেৰণা পাটোৱাৰীয়ে বনৰীয়া হাতীটোৰ মৰণোত্তৰ পৰীক্ষা সম্পন্ন কৰে । ইয়াৰ পিচত বন বিভাগে ঘটনাস্থলীত হাতীটোৰ শৱটো সৎকাৰ কৰে । বনৰীয়া হাতীৰ মাজত হোৱা যুদ্ধৰ ফলত বনৰীয়া হাতীটো আঘাতপ্ৰাপ্ত হৈ আজি মৃত্যুমুখত পৰে ।

লগতে পঢ়ক:Helpless Wild Elephant : ৰঙাপৰাত বনৰীয়া হাতীৰ আৰ্তনাদ