Road accident: ডিফুত শোকাবহ পথ দুৰ্ঘটনাত নিহত এজন, আহত চাৰিজন - One killed in road accident in Diphu

ডিফু,২ ছেপ্টেম্বৰ: ডিফু-মাঞ্জা পথৰ ৰিক্ৰিয়েছন পাৰ্কৰ সন্মূখত ভয়াবহ পথ দুৰ্ঘটনা । দুৰ্ঘটনাত থিতাতে নিহত এজন, আহত চাৰিজনকৈ লোক । উক্ত দুৰ্ঘটনাক কেন্দ্ৰ কৰি তীব্ৰ চাঞ্চল্যৰ বিৰাজ কৰিছে সমগ্ৰ অঞ্চলত ৷ প্ৰাপ্ত তথ্য অনুসৰি শনিবাৰে পুৱা প্ৰায় ৭:৩০ মান বজাত  সংঘটিত হয় ভয়াবহ দূৰ্ঘটনাটো ৷ দুৰ্ঘটনাটোত থিতাতে নিহত হয় এজন ৫০ বছৰীয়া লোক ৷  

নিহত লোকজন ডিফুৰ মাটিপুঙৰ নিৱাসী মৃত দেৱেন টেৰণৰ পুত্ৰ অজয় টেৰণ বুলি জানিব পৰা গৈছে ৷ জানিব পৰা মতে ডিফুৰ ৫ মাইলৰ পৰা ডিফু অভিমুখে আহি থকা AS09BC1984 নম্বৰৰ যাত্ৰীবাহী অট'ৰিক্সাখনত একে দিশৰ পৰা আহি থকা এখন মাৰুতি গাড়ীয়ে অট'খনত পিছফালৰ পৰা খুন্দা মৰাৰ ফলত সংঘটিত হয় দুৰ্ঘটনাটো ৷  

ঘটনা সংঘটিত কৰিয়েই মাৰুতি বাহনখনসহ চালকজন পলায়ন কৰা বুলি জানিব পৰা গৈছে ৷ উক্ত দুৰ্ঘটনাত এগৰাকী পাচলি ব্যৱসায়ীসহ তিনিগৰাকী স্কুলীয়া ছাত্ৰ আহত হয় ৷ আহতসকলক ডিফু চিকিৎসা মহাবিদ্যালয় আৰু হাস্পতাললৈ চিকিৎসাৰ বাবে প্ৰেৰণ কৰা হয় বুলি জানিব পৰা গৈছে ৷ এই সন্দৰ্ভত ডিফু আৰক্ষীয়ে নিহত লোকজনৰ মৰণোত্তৰ পৰীক্ষাৰ ব্যৱস্থা কৰাৰ লগতে ঘটনা সংঘটিত কৰা বাহনখনৰ সন্ধানত তদন্ত অব্যাহত ৰখা বুলি জানিব পৰা গৈছে ৷ 

লগতে পঢ়ক:Mera bill mera adhikar:মৰিগাঁৱত আয়কৰ বিভাগৰ উদ্যোগত মেৰা বিল মেৰা অধিকাৰ শীৰ্ষক কাৰ্যসূচী