Amrit Kalash Yatra : দেশবাসীক সজাগ কৰিবলৈ 'ভোগেশ্বৰী ফুকননী, সাহসৰ অন্য নাম' শীৰ্ষক বাটৰ নাট প্ৰদৰ্শন - Amrit Kalash Yatra at Kaliabor
Published : Oct 9, 2023, 8:56 PM IST
কলিয়াবৰ, 9 অক্টোবৰ :ভাৰতৰ স্বাধীনতাৰ যুঁজাৰুৰ ত্যাগক স্মৰণ কৰিছে সমগ্ৰ দেশে । সমগ্ৰ দেশৰ লগতে ৰাজ্যতো চলি আছে 'অমৃত কলহ যাত্ৰা'। অমৃত কলহ যাত্ৰাৰ সময়তে বাটৰ নাটৰ জৰিয়তে দেশৰ স্বাধীনতা যুঁজত সৰ্বস্ব ত্যাগ কৰা বীৰ-বীৰাংগনাক স্মৰণৰ লগতে দেশবাসীক সজাগ কৰিবলৈ দেশৰ চৰকাৰে লৈছে বিভিন্ন কাৰ্যসূচী । ইতিমধ্যে বাটৰ নাট প্ৰদৰ্শনৰ বাবে নতুন দিল্লীৰ তত্বাৱধান দেশৰ ৰাজ্যসমূহত বাটৰ নাট প্ৰদৰ্শন কাৰ্যসূচী অব্যাহত আছে ৷ অসমৰ নগাঁও জিলাৰ উন্নয়ন খণ্ডসমূহত বাটৰ নাট প্ৰদৰ্শন কৰিবলৈ কেইবাটাও অপেছাদাৰী নাট্য গোষ্ঠীক দায়িত্ব অৰ্পণ কৰিছে ৰাষ্ট্ৰীয় নাট্য বিদ্যালয়, নতুন দিল্লীয়ে । কলিয়াবৰৰ অন্যতম নাট্যচৰ্চা কেন্দ্ৰ হাটবৰ কেন্দ্ৰীয় নাট্য সমাজে সেই কাৰ্যসূচীত অংশ লৈ সোমবাৰে বাটৰ নাট প্ৰদৰ্শন কৰে ৷
হাটবৰ নাট্য সমাজে লাওখোৱা উন্নয়ন খণ্ডত নাট্যকাৰ ভূপেন্দ্ৰনাথ হাজৰিকাৰ ৰচনা আৰু পৰিচালনাৰে 'ভোগেশ্বৰী ফুকননী, সাহসৰ অন্য নাম' নামৰ এখন বাটৰ নাট প্ৰদৰ্শন কৰে । নাটখনিত অভিনয় কৰে ক্ৰমে মিঠু শইকীয়া, ইন্দ্ৰানী হাজৰিকা, প্ৰাণজিৎ হাজৰিকা, বিনয় বৰা, মুৰুলী বৰা, পবিত্ৰ কুমাৰ শইকীয়া, অমূল্য বৰা, দিপু ভূঞা, গৌতম ফুকন, চন্দন শইকীয়া, প্ৰসন্ন শৰ্মা আৰু শিশু পিংকি বৰাই । সংগীতত সহায় কৰে ক্ৰমে অৰুণ বৰা আৰু মোহিত ভূঞাই ।