Majuli murder case: মাতৃক লাঠিৰে মৰিয়াই মৰিয়াই হত্যা পুত্ৰৰ - মাতৃহন্তা পুত্ৰ
মাজুলী, 15 আগষ্ট: স্বাধীনতাৰ দিৱসৰ দিনটোতেই সত্ৰনগৰী মাজুলীত লোমহৰ্ষক ঘটনা সংঘটিত হৈছে ৷ মাজুলীত কলিযুগৰ পৰশুৰামৰ আবিৰ্ভাৱ । অতি নৃশংসভাৱে লাঠিৰে মৰিয়াই মৰিয়াই কুলাংগাৰ পুত্ৰই হত্যা কৰিলে জন্মদাত্ৰী মাতৃক। কুলাংগাৰ পুত্ৰ ৰাহুল কাকতিৰ হাতত মৃত্যু সোনাপী কাকতি নামৰ প্ৰায় ৫৪ বছৰীয়া মাতৃৰ।
মাজুলীৰ যোৰবিল কাঠনিআটী গাৱঁত সংঘটিত হৈছে এই ভয়ংকৰ হত্যাকাণ্ডৰ ঘটনা। ইয়াৰ পূৰ্বেও মাতৃক দাৰে ঘপিয়াই জেলৰ ভাত খাইছিল ৰাহুলে। মঙলবাৰে লাঠিৰে মাতৃক মৰিয়াই থাকোঁতে কাষৰে দুজনমানে বচাবলৈ গৈছিল যদিও উদণ্ড ৰাহুলে সেইকেইজনো প্ৰহাৰ কৰাৰ লগতে এটা মোবাইল ফোন ভাঙি পেলাই।
উক্ত ঘটনাই অঞ্চলজুৰি চাঞ্চল্যৰ সৃষ্টি কৰিছে । ইফালে ৰাহুলৰ বাসগৃহৰ ভিতৰত বস্তাই বস্তাই ভাং উদ্ধাৰ হৈছে। অবৈধভাৱে ভাং বস্তাই বস্তাই ঘৰৰ ভিতৰত ৰাখি থৈছে ৰাহুলে ।
এই ঘটনাৰ পিচতে স্থানীয় লোকে গড়মূৰ আৰক্ষীক খবৰ দিয়াত গড়মূৰ আৰক্ষী ঘটনাস্থলীত উপস্থিত হৈ ৰাহুলক গড়মূৰ থানালৈ গ্ৰেপ্তাৰ কৰি লৈ আহে ৷ স্থানীয় ৰাইজে এনে মাতৃহন্তা পুত্ৰৰ উৎচিত শাস্তিৰ দাবী কৰিছে।
লগতে পঢ়ক:Cachar Madrassa Hostel case: মাদ্ৰাছাৰ শিক্ষক হাফিজ মুকচিন ৰহমান খানক গ্ৰেপ্তাৰ