Silver Jubilee Celebration : ২৫ বছৰীয়া হ’ল চিলাপথাৰ টাউন কলেজ
Published : Nov 4, 2023, 2:29 PM IST
জোনাই, ৪ নৱেম্বৰ : গৌৰৱোজ্জ্বল ২৫ বছৰ গৰকিছে চিলাপথাৰ টাউন কলেজ আৰু চিলাপথাৰ টাউন জুনিয়ৰ মহাবিদ্যালয়ে ৷ ১৯৯৩ চনতে প্ৰতিষ্ঠা লাভ কৰা চিলাপথাৰৰ এই দুখন উচ্চ শিক্ষাৰ অগ্ৰণী প্ৰতিষ্ঠানৰ ৰূপালী জয়ন্তী বৰ্ষ অতি ধুমধামেৰে আয়োজন কৰা হৈছে ৷ সেই উপলক্ষে আজিৰে (শনিবাৰ) পৰা দুদিনীয়া বৰ্ণাঢ্য কাৰ্যসূচীৰে আৰম্ভ কৰা হৈছে ৰূপালী জয়ন্তী বৰ্ষ উদযাপন সমাৰোহ ।
পুৱা গছপুলি ৰোপণেৰে আৰম্ভ হোৱা এই কাৰ্যসূচীৰ পতাকা উত্তোলন কৰে উদযাপন সমিতিৰ সভাপতি তথা বিধায়ক ভূৱন পেগুয়ে । লগতে অঞ্চলটোৰ বিশিষ্ট শিক্ষাবিদসকলৰ দ্বাৰা উত্তোলন কৰা হয় মুঠ ২৪ খনকৈ পতাকা । অনুষ্ঠানত উপস্থিত হৈ বিধায়ক ভূৱন পেগুৱে অঞ্চলটিৰ শিক্ষাৰ ক্ষেত্ৰলৈ মহাবিদ্যালয়খনে আগবঢ়োৱা সুদীর্ঘ ২৫ বছৰীয়া সেৱাৰ বাবে সমূহ মহাবিদ্যালয় পৰিয়ালবৰ্গলৈ আন্তৰিক কৃতজ্ঞতা জ্ঞাপন কৰে ৷ আগন্তুক দিনতো মহাবিদ্যালয়খনে এইদৰেই অঞ্চলটোৰ শিক্ষাৰ ক্ষেত্ৰলৈ সেৱা আগবঢ়াই থাকিব বুলিও তেওঁ মন্তব্য কৰে ।
ৰূপালী জয়ন্তীৰ লগত সংগতি ৰাখি নিৰ্মাণ কৰা মহাবিদ্যালয়খনৰ প্ৰতিষ্ঠাপক সভাপতি শঙ্খনাথ দলেৰ এটি প্ৰতিমূৰ্তি উন্মোচন কৰা হয় । এক উখল মাখল পৰিৱেশৰ মাজতে অনুষ্ঠিত হোৱা ৰূপালী জয়ন্তী বৰ্ষ সমাৰোহখনিৰ দেওবাৰে অনুষ্ঠিত হ’ব লগা মুকলি সভাত শিক্ষামন্ত্ৰী ডাঃ ৰণোজ পেগু, ডিব্ৰুগড় বিশ্ববিদ্যালয়ৰ উপাচাৰ্য ড৹ জিতেন হাজৰিকাৰ লগতে পঞ্জীয়ক ড৹ পৰমানন্দ সোণোৱালো উপস্থিত থাকিব বুলি উদ্যোক্তাসকলে জানিবলৈ দিয়ে ।