Robbery Incident: ঘৰলৈ ঘূৰি অহাৰ পথত ক্ষুদ্ৰ ব্যৱসায়ীক চোকা অস্ত্ৰৰে আক্ৰমণ - চোকা অস্ত্ৰৰ আক্ৰমণ
Published : Nov 10, 2023, 1:28 PM IST
তিনিচুকীয়া, ১০ নৱেম্বৰ: বৃহস্পতিবাৰে তিনিচুকীয়া জিলাৰ ডুমডুমাৰ ৰূপাইৰ দিয়ামুলী গুটিবাৰীত ডকাইতিৰ ঘটনা সংঘটিত হৈছে ৷ ঘটনা অনুসৰি বাচন বৰ্তন বিক্ৰী কৰা এগৰাকী ক্ষুদ্ৰ ব্যৱসায়ীক দুই দুৰ্বৃত্তই চোকা অস্ত্ৰৰে আক্ৰমণ কৰি ধন লুটি নিয়ে ৷ ভুক্তভোগী ক্ষুদ্ৰ ব্যৱসায়ীগৰাকী ৰূপাইৰ মহম্মদ তাহিৰ চাফিৰ বুলি জানিব পৰা গৈছে ৷
লোকজনে দীঘলতৰঙৰ পৰা সামগ্ৰী বিক্ৰী কৰি উভতি আহোঁতে সংঘটিত হয় এই ডকাইতিৰ ঘটনা ৷ চোকা অস্ত্ৰৰ আক্ৰমণত তেওঁৰ ডিঙিত ৮ টাকৈ চিলাই পৰে ৷ তাৰ পিচতে লোকজনক ৰূপাই ডি চি বৰা নাৰ্ছিং হোমত চিকিৎসাধীন কৰে ৷ ভুক্তভোগী ব্যক্তিগৰাকীয়ে জনোৱা অনুসৰি, মটৰ চাইকেলত অহা দুৰ্বৃত্তই ব্যক্তিজনৰ পকেটত থকা প্ৰায় ৩ হাজাৰ টকা লৈ উধাও হয় ঘটনাস্থলীৰ পৰা ৷
পৰৱৰ্তী সময়ত আৰক্ষীয়ে উক্ত ঘটনাৰ তদন্ত আৰম্ভ কৰিছে ৷ যদিও ডুমডুমা অঞ্চলত সঘনাই সংঘটিত এনেদৰে হোৱা ডকাইতিৰ ঘটনাই এতিয়া সকলোকে আতংকিত কৰি তুলিছে ৷