One dies due to electrocution: বেৰৰ ফুটাৰে জুমিবলৈ গৈ চৰ্ট শ্বাৰ্কিট হৈ এজনৰ মৃত্যু - চৰ্ট শ্বাৰ্কিট হৈ এজনৰ মৃত্যু
বাক্সা, ১৬ আগষ্ট: বাক্সা জিলাৰ বৰমা থানাৰ অন্তৰ্গত মহখুলী ৰিজাৰ্ভত মঙলবাৰে এক অঘটন সংঘটিত হয়। এই ঘটনাত ৰাজু বড়ো নামৰ এজন লোক চৰ্ট শ্বাৰ্কিট হৈ মৃত্যু হয় ৷
ঘটনাৰ বিৱৰণী মতে যোৱা কেইবাদিন ধৰি দুলাৰায় বড়োৰ ঘৰৰ পিচফালে কোনোবাই নিশা বেৰৰ ফুটা কৰি চাই থকাৰ উমান পায়। এই ঘটনা কেইবাদিন ধৰি চলি থাকে যদিও কোনে এই কাম কৰিছে দুলাৰায় বড়ো আৰু তেওঁৰ পত্নীয়ে ধৰিব পৰা নাছিল ৷ সেয়েহে চোৰ ধৰিবৰ কাৰণে তেওঁলোকে ঘৰৰ পিচপিনে লাইনৰ তাঁৰেৰে সংযোগ কৰি বেৰ দিয়ে ৷
ইয়াৰ পিচতেই মঙলবাৰে নিশা এজন ব্যক্তি পূৰ্বৰ দৰে আহোঁতে চৰ্ট শ্বাৰ্কিট হৈ মৃত্যুৰ মুখত পৰে ৷ মৃত লোকজন একে গাঁৱৰে ৰাজু বড়ো বুলি জানিবলৈ দিয়ে। পৰিয়ালৰ লোকে জনোৱামতে ৰাজু বড়োৱে পুৰ্বেও এনে ধৰণৰ অসামাজিক কাম কৰি ধৰা পৰিছিল ৷
ইতিমধ্যে বৰমা থানাৰ ভাৰপ্ৰাপ্ত আৰক্ষী বিষয়া দিতুমণি গোস্বামীৰ নেতৃত্বত দুলাৰায় বড়োক আটক কৰিছে আৰু মৃত ৰাজু বড়োৰ মৃতদেহ মৰণোত্তৰ পৰীক্ষাৰ কাৰণে মুছলপুৰলৈ প্ৰেৰণ কৰিছে।