চিৰদিনলৈ বুকু উদং হোৱা অভিভাৱকৰ কান্দোন শুনিবনে চৰকাৰী পক্ষই ? - নগাঁৱৰ ইংলিছপট্টিৰ শুভাংকুৰ সাহা

নগাঁও, 17 নৱেম্বৰ :মনত আছেনে নগাঁৱৰ শুভাংকুৰ সাহাৰ ৰহস্যজনক হত্যাকাণ্ডৰ কথা ? সেই যে অচিনাকি ফোনকল এটাত ঘৰৰ পৰা ওলাই গৈ পুনৰ ঘৰলৈ ঘূৰি নহা শুভাংকুৰ সাহা ! হয় বিগত বৰ্ষৰ ডিচেম্বৰ মাহত সংঘটিত হোৱা এই ঘটনাই থান-বান কৰি পেলাইছিল পৰিয়ালটি ৷ এতিয়া ৰহস্যজনকভাৱে  মৃত্যু হোৱাৰ ন মাহৰ মূৰত উদ্ধাৰ হৈছে শুভাংকুৰৰ মোবাইল ফোনটো ৷ অতমাহে অসম আৰক্ষীৰ ওচৰলৈ গৈ গৈ ভাগৰি পৰিছে পিতৃ-মাতৃ ৷

অৱশেষত পুত্ৰৰ হত্যাৰ ন্যায় বিচাৰি পিতৃয়ে দেশৰ প্ৰধানমন্ত্ৰীলৈ প্ৰেৰণ কৰিছে পত্ৰ । ২০২২ চনৰ 3 ডিচেম্বৰত ঘৰৰ পৰা ওলাই যোৱা নগাঁৱৰ ইংলিছপট্টিৰ শুভাংকুৰ সাহাৰ ৫ ডিচেম্বৰত মৃতদেহ উদ্ধাৰ হৈছিল নগাঁৱৰ মাজৰআটিৰ এটা পুখুৰীত । মৃতদেহত আছিল আঘাতৰ চিন । পুত্ৰৰ মৃত্যুত সন্দেহ উপজিছিল পিতৃ চিত্তৰঞ্জন সাহাৰ । ৩ ডিচেম্বৰত এগৰাকী যুৱতীয়ে মাতি নিছিল শুভাংকুৰ সাহাক । ঘটনা সন্দৰ্ভত পিতৃয়ে হয়বৰগাঁও আৰক্ষী চকীত দাখিল কৰিছিল এজাহাৰ । সেই সময়ৰ আৰক্ষী অধীক্ষকৰ কাৰ্যালয়ৰ পৰা থানাই থানাই ঘূৰি আজিও ন্যায় নাপালে দুৰ্ভগীয়া পৰিয়ালে । উপায়হীন হৈ পুত্ৰৰ হত্যাৰ ন্যায় বিচাৰি প্ৰধানমন্ত্ৰী আৰু মুখ্যমন্ত্ৰীলৈ পত্ৰ প্ৰেৰণ কৰিছে দুৰ্ভগীয়া পিতৃয়ে । এতিয়াও মুক্ত আকাশৰ তলত হত্যাকাৰী । ইতিমধ্যে নগাঁৱৰ আৰক্ষী অধীক্ষক নৱনীত মহন্তই হত্যাকাৰীক বিচাৰি উলিওৱাৰ আশ্বাস প্ৰদান কৰিছে শুভাংকুৰৰ পিতৃক ।

লগতে পঢ়ক :Mysterious death case: ৰহস্যজনকভাৱে ৰিপুঞ্জয় গোস্বামীৰ ঘৰত উদ্ধাৰ প্ৰণীতাৰ মৃতদেহ