Fire in Melamati:মেলামাটিত নিশা দুৰ্বৃত্তই অগ্নিসংযোগ কৰিলে বাসগৃহত
Published : Oct 4, 2023, 5:07 PM IST
যোৰহাট, ৪ অক্টোবৰ:যোৰহাট জিলাৰ তিতাবৰৰ মেলামাটিত মঙলবাৰে নিশা সংঘটিত হয় ভয়ংকৰ অগ্নিকাণ্ড । উক্ত অগ্নিকাণ্ডৰ ফলত কেইবা লক্ষাধিক টকাৰ সা সম্পত্তি ভস্মীভূত হয় । ভুক্তভোগী পৰিয়ালৰ লোকে উল্লেখ কৰা মতে,দুৰ্বৃত্তই নিশা প্ৰায় ১১ বজাত আন্ধাৰৰ সুযোগ লৈ এই দুস্কাৰ্য সংঘটিত কৰে । ঘৰৰ আগফালে আৰু পাছফালে পেট্ৰ'লৰ গোন্ধ পোৱা গৈছিল বুলি ভুক্তভোগী পৰিয়ালৰ লোকে উল্লেখ কৰে । তিতাবৰৰ মেলামটি কছাৰীৰ গাঁৱৰ চুভান আলী আৰু আবেদা বেগমৰ ঘৰত সংঘটিত হয় এই অগ্নিকাণ্ডৰ ঘটনা ।
অগ্নি নিৰ্বাপক বাহিনী আৰু গাঁওবাসীৰ তৎপৰতাত জুই নিৰ্বাপন কৰিবলৈ সক্ষম হয় যদিও ভস্মীভূত হয় বাসগৃহ দুটাৰ লগতে বিভিন্ন আচবাব,সোণৰ আ-অলংকাৰ । তদুপৰি কেইবাটাও পোহনীয়া জীৱ- জন্তু জীৱন্তে জুইত জাহ যায় । উল্লেখ্য যে তিতাবৰ নগৰ বৃহত্তৰ অঞ্চল হিচাপে পৰিচিত মেলামাটিত দিনকে দিনে চোৰ ডকাইতিৰ লগতে দুস্কৃতিকাৰীৰ অতপালি বৃদ্ধি পাই আহিছে । ফলত এটাৰ পিছত আন এটা দুস্কাৰ্য উক্ত অঞ্চলটোত সংঘটিত হৈ আহিছে । সেয়েহে বৃহত্তৰ অঞ্চলটোৰ ৰাইজ নিৰাপত্তাহীনতাত ভুগিবলগীয়া হৈছে ।
আনহাতে অপৰাধ জনিত ঘটনা উক্ত অঞ্চলটো বৃদ্ধি পাই অহা পিছতো অঞ্চলটো এনেধৰণ ঘটনা ৰোধ কৰাত আৰক্ষী সম্পূৰ্ণ ৰূপে বিফল হোৱা গুৰুত্ব অভিযোগ উথাপিত হৈছে । মঙলবাৰে নিশা প্ৰায় ১১ বজাত সংঘটিত হোৱা অগ্নিকাণ্ড ঘটনাই বৃহত্তৰ অঞ্চলটোত তীব্ৰ চাঞ্চল্যৰ সৃষ্টি কৰিছে ।