massive fire broke out:বিচনাতেই জুইত ছাই হৈ গ’ল এটি দেৱশিশু

কলগাছিয়া, 26 ছেপ্টেম্বৰ :কলগাছিয়াৰ গলিয়াত জুইত জাহ গ’ল তিনি বছৰীয়া শিশু । লগতে সম্পূৰ্ণৰূপে ভস্মীভূত হয় দুটাকৈ বাসগৃহ ৷ ঘৰত থকা সকলো নথি-পত্ৰ ছাই হৈ গ’ল । ঘটনাটোক কেন্দ্ৰ কৰি অঞ্চলজুৰি শোকৰ ছাঁ ।

বৰপেটা জিলাৰ কলগাছিয়া ৰাজহ চক্ৰৰ অন্তৰ্গত গলিয়াত দুটাকৈ বাসগৃহৰ লগতে তিনিবছৰীয়া শিশু এটি সম্পূৰ্ণৰূপে ভস্মীভূত হয় । আনুমানিক প্ৰায় পাঁচ লাখ টকাৰ সা-সম্পত্তি, এক লাখ টকা নগধ ধন আৰু নথি-পত্ৰ সম্পূৰ্ণৰূপে জাহ যায় জুইত । জানিব পৰা মতে, ৰফিক ইছলামৰ কনিষ্ঠ পুত্ৰ ৰেজাউল কৰিম শুই থকা অৱস্থাতে হঠাৎ ৰন্ধন গেছৰ পৰা ঘৰত জুই লাগে ৷ জুইৰ লেলিহান শিখাই আৱৰি ধৰে ঘৰ আৰু ঘৰৰ সা-সামগ্ৰীৰ লগতে ৰেজাউলো সম্পূৰ্ণৰূপে জুইত শেষ হৈ যায় ।

প্ৰাপ্ত তথ্য মতে, চিলিণ্ডাৰৰ পৰা জুইৰ সূত্ৰপাত হয় ৷ দুটাকৈ বাসগৃহৰ লগতে ৰেজাউল কৰিম নামৰ দেৱশিশুটিৰ মৃত্যুত সকলোৱে উচুপি উঠিছে ৷ পৰৱৰ্তী সময়ত হাউলী আৰক্ষী উপস্থিত হৈ মৃতদেহ মৰণোত্তৰ পৰীক্ষাৰ বাবে বৰপেটা চিকিৎসা মহাবিদ্যালয়লৈ প্ৰেৰণ কৰে । এই অনাকাংক্ষিত শোকাকুল ঘটনাৰ বাবে বৃহত্তৰ অঞ্চলব্যাপি শোকৰ ছাঁ পৰিছে ৷

লগতে পঢ়ক :massive fire broke out:কলগাছিয়া বজাৰত ভয়ংকৰ অগ্নিকাণ্ড