অটোৰে মৰণা মৰাই কাল হ'ল কৃষকৰ - Huge quantity of paddy burnt in fire in Cachar

কাছাৰ, ২৪ ডিচেম্বৰ:কাছাৰ জিলাৰ কাটিগড়াৰ চেউতিত সংঘটিত হয় এক ভয়ংকৰ অগ্নিকাণ্ড । যাত্ৰীবাহী অটোৰে মৰণা মৰাৰ সময়ত সংঘটিত হয় এই ভয়ংকৰ অগ্নিকাণ্ডৰ । মূহুৰ্ততে জুইত জ্বলি ভস্মীভূত হয় মৰণা মৰি থকা ধানসহ অটোখন । জানিব পৰা মতে, স্থানীয় নৰুল হক নামৰ এগৰাকী কৃষকে তেওঁৰ ধান মৰণা মৰাৰ বাবে এখন যাত্ৰীবাহী অটো ভাড়া কৰিছিল । অটোখনেৰে মৰণা মাৰি থকাৰ সময়তে হঠাৎ জুইৰ সূত্ৰপাত ঘটে আৰু মূহুৰ্ততে জুইৰ লেলিহান শিখাই ছানি ধৰে মৰণা মাৰি থকা ধানখিনিত ।  

স্থানীয় লোকসকলে জুই নিয়ন্ত্ৰণৰ চেষ্টা চলায় যদিও নিমিষতে জুইত জ্বলি ভস্মীভূত হয় সকলো ধান । খবৰ পোৱা মাত্ৰকে ঘটনাস্থলীত আৰক্ষীসহ অগ্নিনিৰ্বাপক বাহিনী উপস্থিত হয় যদিও ইয়াৰ পূৰ্বেই জুইত জাহ যায় নৰুল হক নামৰ কৃষকজনৰ প্ৰায় তিনি বিঘা ভূমিৰ ধান । ভয়ংকৰ এই অগ্নিকাণ্ডৰ প্ৰকৃত কাৰণ জানিব পৰা হোৱা নাই যদিও মৰণা মৰাত ব্যবহৃত অটোৰ যান্ত্ৰিক বিজুতিৰ বাবে হয়তো জুইৰ সূত্ৰপাত ঘটিব পাৰে বুলি সন্দেহ কৰা হৈছে ।

লগতে পঢ়ক:আলফা(স্বা)ৰ সদস্যৰ সন্দেহত শদিয়াৰ তিনি যুৱকলৈ আৰক্ষীৰ গুলী