তিতাবৰ তৃতীয় আৰক্ষী বাহিনীৰ চৌহদত ভয়ংকৰ অগ্নিকাণ্ড

যোৰহাট, 21 ডিচেম্বৰ : তিতাবৰ তৃতীয় অসম আৰক্ষী বাহিনীৰ চৌহদত আজি হঠাতে অগ্নিকাণ্ডৰ ঘটনা সংঘটিত হয়, ফলত তৃতীয় অসম আৰক্ষী জোৱানসকলৰ মাজত হুৱাদূৱা লাগে । ঘটনাৰ বিৱৰণী অনুসৰি, চৌহদত এটা বাঁহেৰে তথা তৰ্জাবেৰেৰে নিৰ্মিত ৰান্ধনীশাল হঠাতে জুয়ে আৱৰি ধৰে, ফলত কাষতে অৱস্থিত আৰক্ষী বেৰিকেডত থকা জোৱানসকলৰ মাজত এক আতংকময় পৰিৱেশৰ সৃষ্টি হয় ৷

কিন্তু সৌভাগ্যক্ৰমে, এই জুয়ে আৰক্ষী জোৱান থকা বেৰিকেডৰ ক্ষতি সাধন কৰিবলৈ সক্ষম নহ’ল আৰু আৰক্ষী জোৱানসকলৰ একক প্ৰচেষ্টাত এই জুই নিৰ্বাপিত কৰিবলৈ সক্ষম হয় ৷ উক্ত স্থানত সেইসময়ত কেইবাখনো অগ্নি নিৰ্বাপক বাহিনীৰ গাড়ী উপস্থিত হৈ অন্য স্থানলৈ জুইৰ ফিৰিঙতি যাতে বিয়পিব নোৱাৰে তাৰ ব্যৱস্থা কৰে ৷ উক্ত অগ্নিকাণ্ডৰ ঘটনাৰ ফলত আৰক্ষী বাহিনীৰ ভিতৰে-বাহিৰে এক আতংকময় পৰিৱেশে বিৰাজ কৰিছে । এই অগ্নিকাণ্ডৰ ফলত আৰক্ষী জোৱানসকলৰ বাবে খাদ্য প্ৰস্তুত কৰা ৰান্ধনীশালটো সম্পূৰ্ণ ৰূপে ভস্মীভূত হয় ।

লগতে পঢ়ক :বজাৰত অগ্নিকাণ্ড; খবৰ দিয়াৰ দুঘণ্টাৰ পিচতো উপস্থিত নহ’ল অগ্নিনিৰ্বাপক বাহিনী