Fire breaks out in Nagaon : নগাঁৱৰ মেট্ৰিক্স জুনিয়ৰ কলেজত অগ্নিকাণ্ড
নগাঁও, 29 জুলাই : নগাঁৱৰ আমোলাপট্টিৰ মেট্ৰিক্স জুনিয়ৰ কলেজত শনিবাৰে পুৱাৰ ভাগত সংঘটিত হয় অগ্নিকাণ্ডৰ ঘটনা । অগ্নিকাণ্ডৰ ফলত শৈক্ষিক প্ৰতিষ্ঠানখনৰ ভিতৰৰ বহু সামগ্ৰী ভষ্মীভূত হয় । কণিষ্ঠ মহাবিদ্যালয়খনৰ পিছফালৰ অংশ সম্পূৰ্ণৰূপে জাহ যায় বুলি জানিবলৈ পৰা গৈছে ।
প্ৰায় 8-10 লাখ টকাৰ সম্পত্তি ভস্মীভূত হোৱা বুলি কয় কণিষ্ঠ মহাবিদ্যালয়খনৰ কৰ্তৃপক্ষই । উল্লেখ্য যে, শনিবাৰে মহৰমৰ বাবে বন্ধ আছিল শিক্ষানুষ্ঠানখন । পুৱা কণিষ্ঠ মহাবিদ্যালয়খনত অগ্নিকাণ্ড সংঘটিত হোৱা প্ৰত্যক্ষ কৰি স্থানীয় লোকে মহাবিদ্যালয় কৰ্তৃপক্ষক খবৰ দিয়াৰ লগতে অগ্নিনিৰ্বাপক বাহিনীকো খবৰ দিয়ে ।
অগ্নিনিৰ্বাপক বাহিনীৰ দল উপস্থিত হৈ শিক্ষা প্ৰতিষ্ঠানখনত অগ্নি নিৰ্বাপন কৰিবলৈ সক্ষম হয় । অগ্নিকাণ্ড কাৰণ এই পৰ্যন্ত স্পষ্ট হোৱা নাই যদিও স্মাৰ্ট মিটাৰত শ্বৰ্ট চাৰ্কিট হোৱাৰ ফলতেই এই অগ্নিকাণ্ড সংঘটিত হোৱাৰ সন্দেহ প্ৰকাশ কৰিছে মেট্ৰিক্স জুনিয়ৰ কলেজ কৰ্তৃপক্ষই ।