Road Accident in Tinsukia: নিচাসক্ত চালকে বলেৰ’ বাহনেৰে মহতিয়াই নিলে দোকান পোহাৰ,পথচাৰীক - চাৰিগৰাকী লোকক খুন্দিয়াই গুৰুতৰভাৱে আঘাত

তিনিচুকীয়াৰ জি এন বি পথত বৃহস্পতিবাৰে বিয়লি সংঘটিত হয় এক ভয়ংকৰ পথ দুৰ্ঘটনা (Road Accident in Tinsukia)৷ প্ৰাপ্ত তথ্য অনুসৰি, AS06 Z 6476 নম্বৰৰ এখন বলেৰ’ বাহনে নিয়ন্ত্ৰণ হেৰুৱাই পদপথৰ কাষত থকা বিপনী, ৰিক্সা, ঠেলা আদি মহতিয়াই নিয়াৰ লগতে চাৰিগৰাকী লোককো খুন্দিয়াই গুৰুতৰভাৱে আঘাতপ্ৰাপ্ত কৰে (Many injured in road accident)৷ দুৰ্ঘটনাটোৰ পাছতে সেই স্থানত উপস্থিত সকলোৰে মাজত লাগে হুৱা-দুৱা ৷ ইফালে একাংশই আঘাতপ্ৰাপ্তসকলক ততাতৈয়াকৈ তিনিচুকীয়া অসামৰিক চিকিৎসালয়লৈ নি ভৰ্তি কৰে ৷ দুৰ্ঘটনাৰ খবৰ পোৱাৰ পাছতে ঘটনাস্থলীত তিনিচুকীয়া আৰক্ষী উপস্থিত হৈ বাহনখনৰ চালকজনক স্থানীয় ৰাইজৰ সহযোগত কৰায়ত্ব কৰাৰ লগতে বাহনখনত অহা এগৰাকী যুৱতীক আটক কৰিবলৈ সক্ষম হয় ৷ প্ৰত্যক্ষদৰ্শীৰ অভিযোগ, বাহনখনত অহা দুই যুৱক-যুৱতীয়েই আছিল সুৰাসক্ত অৱস্থাত ৷