Assam flood: বৰপেটাত বানৰ ভয়াৱহ ৰূপ
বৰপেটা,24 জুনঃৰাজ্যত অপৰিৰ্ৱতিত বান পৰিস্থিতি ৷ বৰপেটা জিলাৰ নখন্দা, মৰা চাউলখোৱা আৰু ভেলেঙী নদীৰ জলস্তৰ বৃদ্ধি পোৱাত বান পৰিস্থিতি অধিক অৱনতি ঘটিছে । বৰপেটা জিলাৰ মৰা চাউলখোৱা নৈ বিপদসীমাৰ পৰা ১.৪৪ মিটাৰ আৰু নখন্দা নৈ বিপদসীমাৰ পৰা ১.৫৭ মিটাৰ ওপৰেৰে বৈ আছে । তদুপৰি ভেলেঙী নদীৰ পানী বিপদ সীমাৰ ১.১২ মিটাৰ ওপৰেৰে বৈ আছে ।
জিলা প্ৰশাসনৰ তথ্য অনুসৰি বৰপেটাৰ প্ৰায় ৭৩,২৩৩ জন লোক বানত ক্ষতিগ্ৰস্ত হৈছে ৷ ইয়াৰ উপৰিও ২৫২.৫০ হেক্টৰ কৃষিভূমি বানত ক্ষতিগ্ৰস্ত হৈছে । বৰপেটা জিলাৰ চেঙা, সৰ্থেবাৰী আৰু বৰপেটা ৰাজহ চক্ৰৰ অন্তৰ্গত অঞ্চলসমূহ বেছিকৈ ক্ষতিগ্ৰস্ত হৈছে বানত । সৰ্থেবাৰী ৰাজহ চক্ৰৰ অন্তৰ্গত ৪৭ খন গাঁও,বৰপেটা ৰাজহ চক্ৰৰ অন্তৰ্গত ১৭ খন গাঁও আৰু চেঙা ৰাজহ চক্ৰৰ অন্তৰ্গত ৯ খন গাঁও বৰ্তমানেও বানত প্লাৱিত হৈ আছে ৷
দুদিন ধৰি বৰষুণ অহা নাই যদিও বৰপেটা জিলাৰ নখন্দা, মৰা চাউলখোৱা আৰু ভেলেঙী নদীৰ পানী বাঢ়ি থকাৰ ফলত জনসাধাৰণ শংকিত হৈছে ৷