Fire break out in Sivasagar: শিৱসাগৰৰ হালোৱাটিঙত নিশা ভয়ংকৰ অগ্নিকাণ্ড
শিৱসাগৰৰ হালোৱাটিঙত ভয়ংকৰ অগ্নিকাণ্ডৰ ঘটনা সংঘটিত হয় (Fire break out in Sivasagar)। হালোৱাটিং আৰক্ষী থানাৰ অন্তৰ্গত গায়েন গাঁও পালাবস্তিত সংঘটিত হয় এই অগ্নিকাণ্ড । অগ্নিকাণ্ডত নিমিষতে জাহ যায় এটা আৱাস গৃহ । গায়ন গাঁৱৰ সঞ্জয় কঞা নামৰ লোকজনৰ গৃহত সংঘটিত হয় এই অগ্নিকাণ্ডৰ ঘটনা ৷ অগ্নিকাণ্ডৰ পাছত সৰ্বস্ব হেৰুৱাই নিঠৰুৱা হৈ পৰে সঞ্জয় কঞাৰ পাঁচজনীয়া সদস্যৰ পৰিয়ালটি ।
অগ্নিকাণ্ড সংঘটিত হোৱাৰ লগে লগে স্থানীয় ৰাইজে জুই নিৰ্বাপনৰ চেষ্টা অব্যাহত ৰাখে যদিও জুইয়ে সমগ্ৰ ঘৰটো ছানি ধৰে । ইফালে ঘটনাস্থলীত বহু পলমকৈ আমগুৰিৰ পৰা যোৱা অগ্নিনিৰ্বাপকৰ এটা দল উপস্থিত হৈ জুই নিৰ্বাপন কৰিবলৈ সক্ষম হয় যদি ঘৰটো অগ্নিকাণ্ডত সম্পূৰ্ণৰূপে চাৰখাৰ হৈ যায় । সমান্তৰালকৈ ঘটনাস্থলীত হালোৱাটিং আৰক্ষীৰ দল উপস্থিত হৈ অগ্নিকাণ্ডৰ ঘটনাটোৰ প্ৰাৰম্ভিক তদন্ত আৰম্ভ কৰিছে যদিও অগ্নিকাণ্ডৰ প্ৰকৃত কাৰণ বৰ্তমানলৈ জানিব পৰা হোৱা নাই ।