ব্যৱসায়িক প্ৰতিষ্ঠানত অগ্নিকাণ্ড, কথমপি ৰক্ষা পৰিল আন কেইবাখনো বিপণি

গোলাঘাট, 12 ডিচেম্বৰ : গোলাঘাট চহৰত ভয়ংকৰ অগ্নিকাণ্ডৰ ঘটনা সংঘটিত হৈছে। সোমবাৰে নিশা চহৰৰ চৰকাৰী বেজবৰুৱা উচ্চতৰ মাধ্যমিক বিদ্যালয়ৰ সন্মুখত সংঘটিত হয় এক অগ্নিকাণ্ডৰ ঘটনা । এই অগ্নিকাণ্ডৰ ফলত এখন ব্যৱসায়ী প্ৰতিষ্ঠানৰ সামগ্ৰী সম্পূৰ্ণৰূপে জুইত জাহ যায় । 

জানিব পৰা মতে, জ্যোতি চাৰ্ভিচ নামৰ ব্যৱসায়িক প্ৰতিষ্ঠানখনৰ স্বত্বাধিকাৰীয়ে দোকান বন্ধ কৰি ঘৰলৈ যোৱাৰ পাচত তেখেতৰ ভগ্নীয়ে দোকানৰ ভিতৰৰ পৰা ধোঁৱা ওলোৱা দেখি হুৱাদুৱা লগায় ৷ লগে লগে স্থানীয় লোক ঘটনাস্থলীত উপস্থিত হৈ গোলাঘাট অগ্নিনিৰ্বাপক বাহিনীক খবৰ দিয়ে ৷ খবৰ দিয়াৰ লগে লগে সেই স্থানত উপস্থিত হয় গোলাঘাট জিলাৰ অগ্নি নিৰ্বাপক বাহিনীৰ এটা দল ৷ অগ্নি নিৰ্বাপক বাহিনীৰ দলটোৱে জুই নিৰ্বাপিত কৰিবলৈ সক্ষম হয় যদিও দোকানখনৰ সা-সামগ্ৰীসমূহ সম্পূৰ্ণৰূপে জুইত জাহ যায় ৷ 

দুৰ্ভগীয়া পৰিয়ালটোৰ একমাত্ৰ উপাৰ্জনৰ থল হৈছে এই দোকানখন । এই অগ্নিকাণ্ডত প্ৰায় 5 লাখ টকাৰ ক্ষতিসাধন হৈছে বুলি জানিবলৈ দিয়ে। শ্বৰ্ট চাৰ্কিটৰ ফলত এই অগ্নিকাণ্ডৰ সূত্ৰপাত হোৱাৰ সন্দেহ প্ৰকাশ কৰিছে অগ্নিনিৰ্বাপক বাহিনীৰ লোকে।

লগতে পঢ়ক:দিন দুপৰতে এজনৰ পৰা লুটিলে প্ৰায় ৫০ হাজাৰ টকা