খেল মহাৰণৰ প্ৰতিযোগীৰ সৈতে সমানে দৌৰিলে বিধায়কে
Published : Dec 1, 2023, 2:32 PM IST
ৰঙিয়া, 1 ডিচেম্বৰ: খেল মহাৰণৰ প্ৰতিযোগীৰ সৈতে সমানে দৌৰিলে ৰঙিয়া বিধানসভা সমষ্টিৰ বিধায়ক তথা অসম ৰাজ্যিক বিজেপিৰ সভাপতি ভৱেশ কলিতাই । ৰাজ্যৰ বিভিন্ন প্ৰান্তৰ সমান্তৰালভাৱে শুকুৰবাৰ ৰঙিয়াতো আয়োজিত হয় খেল মহাৰণ 2023 । এই প্ৰতিযোগিতাত অংশগ্ৰহণ কৰিছে বৃহত্তৰ অঞ্চলটোৰ সহস্ৰাধিক খেলুৱৈয়ে ।
খেলুৱৈসকলৰ উৎসাহ বৰ্ধনৰ বাবে খেলপথাৰত উপস্থিত হ'ল ৰঙিয়াৰ বিধায়ক ভৱেশ কলিতা । বিধায়কগৰাকীয়ে পতাকা জোকাৰি খেল উন্মোচন কৰাৰ লগতে খেলুৱৈসকলৰ উৎসাহ বৃদ্ধিৰ বাবে নিজেও দৌৰ প্ৰতিযোগিতাত অংশগ্ৰহণ কৰে । বিধায়কগৰাকীৰ লগতে প্ৰতিযোগিতাত অংশগ্ৰহণ কৰে নাথ যোগী সন্মিলনৰ অধ্যক্ষ বেণুধৰ নাথেও। বিধায়কগৰাকীক খেলুৱৈসকলৰ লগতে উপস্থিত দৰ্শকে হাত চাপৰি বজাই উৎসাহ বৃদ্ধি কৰা পৰিলক্ষিত হয় ।
প্ৰতিযোগিতাৰ অন্তত বিধায়কগৰাকীয়ে বিজয়ীসকললৈ পদক প্ৰদান কৰে। ৰঙিয়াৰ খেলুৱৈয়ে ৰাজ্যিক তথা ৰাষ্ট্ৰীয় পৰ্যায়ত সুনাম কঢ়িয়াই আনিব বুলি আশা প্ৰকাশ কৰে বিজেপি বিধায়কগৰাকীয়ে ।
লগতে পঢ়ক:কলিয়াবৰত চাৰিদিনীয়াকৈ অনুষ্ঠিত সমষ্টিভিত্তিক খেল মহাৰণ 2023 ৰ সামৰণি