পহুৰ পোৱালি কোঁচত লৈ চুমা যাচিলে অংগনৱাড়ী কৰ্মীয়ে

কলিয়াবৰ, 5 জানুৱাৰী : কিমান আৰু হাতী-মানুহৰ সংঘাত, বাঘৰ আক্ৰমণত মানুহ আঘাতপ্ৰাপ্ত হোৱাৰ খবৰ পঢ়িব, আজি পঢ়ক অন্য ধৰণৰ এটা বাতৰি, চাওক মন ভাল লাগি যোৱা এটা দৃশ্য ৷ এগৰাকী মহিলাই পহু পোৱালি এটাক কোঁচত লৈ মূৰত যাচিছে চুমা ৷

দৰাচলতে শুকুৰবাৰৰ পুৱাই কামলৈ বুলি ওলাই গৈ অংগনৱাড়ী কৰ্মীয়ে প্ৰত্যক্ষ কৰে এটা পহু পোৱালি ৷ কুঁৱৰীটোল মাধৱ গাঁৱত থকা চৰ্দাৰ বল্লভভাই পেটেল মজলীয়া বিদ্যালয়ৰ চৌহদৰ ভিতৰত থকা অংগনবাড়ী কেন্দ্ৰত এই কণমানি পহু পোৱালিটো উদ্ধাৰ হয় ৷ কেন্দ্ৰৰ দৰ্জা খোলাৰ লগে লগে কৰ্মীয়ে কলঙৰ দিশৰ পৰা পোৱালিটো দৌৰি কেন্দ্ৰলৈ সোমাই অহা প্ৰত্যক্ষ কৰে ৷ মৰমলগা পোৱালিটো দেখি তেওঁলোক আনন্দত আত্মহাৰা হৈ পৰে ৷ মাতৃৰ উমাল বুকুৰ পৰা ওলাই অহা পোৱালিটো কোঁচত তুলি ল’লে তাৰে এগৰাকীয়ে ৷ যাচিলে মাতৃস্নেহৰ চুমা ৷ পহু পোৱালিটোৱেও পলাবলৈ চেষ্টা নকৰে ৷ এক মন জুৰোৱা দৃশ্য ৷

কলিয়াবৰত বনৰীয়া হাতী, ম’হ, গাহৰিৰ সন্ত্ৰাসৰ মাজতে দিন কটাই আছে ৰাইজে ৷ তাৰ মাজতে এই দৃশ্যই সকলোকে আপ্লুত কৰিছে ৷ ইয়াৰ পাচত অংগনবাড়ী কেন্দ্ৰৰ কৰ্তৃপক্ষই বন-বিভাগক চমজাই দিয়ে পহু পোৱালিটো । উল্লেখ্য যে, ২০১৭ চনৰ বানৰ পাচতেই কলঙৰ দুয়োপাৰে থকা হাবি পহুৰ বাসস্থান হৈ পৰিছে । কিন্তু দুখৰ বিষয় যে কেবাটাও পহুৰ ৩৭ নং ৰাষ্ট্ৰীয় পথত দুৰ্ঘটনাত পতিত হৈ মৃত্যু হৈছে ।

লগতে পঢ়ক :বনৰীয়া ম’হৰ আক্ৰমণত এজন লোকৰ মৃত্যু