Attempt to Rape: মাজুলীৰ অফলামুখ ফেৰীঘাটৰ সমীপত বহিঃৰাজ্যৰ যুৱতীক ধৰ্ষণৰ চেষ্টা

মাজুলী, 13 এপ্ৰিল: ৰঙালীৰ আনন্দ-উল্লাসৰ মাজতে মাজুলীত সংঘটিত হ'ল এক ভয়ংকৰ ঘটনা ৷ মাজুলীৰ অফলামুখ ফেৰী ঘাটৰ সমীপত বহিঃৰাজ্যৰ যুৱতীক ধৰ্ষণৰ চেষ্টা দুৰ্বৃত্তৰ ৷  

মাজুলীত ফুৰিবলৈ আহিছিল হাইদৰাবাদৰ এগৰাকী যুৱতী ৷ বৃহস্পতিবাৰে অফলামুখ ফেৰী ঘাটৰ সমীপৰ এডৰা হাবিত কোনো দুৰ্বৃত্তই ধৰ্ষণৰ চেষ্টা চলাইছিল যুৱতীগৰাকীক ৷ যুৱতীগৰাকীৰ সকলো কাপোৰ ফালি দিয়াৰ লগতে দেহত দুৰ্বৃত্তৰ আক্ৰমণৰ বাবে তেজেৰে ৰাঙলী হৈ পৰে ৷ 

মাজুলী ফুলনীৰ পৰা এখন ই-ৰিক্সা লৈ ফেৰী ঘাটলৈ আহিছিল যুৱতীগৰাকী আৰু ই-ৰিক্সাখনৰ চালকে আধা বাটতে যুৱতীগৰাকীক এৰি গৈছিল বুলি জানিব পৰা গৈছে ৷ ইয়াৰ কিছু সময়ৰ পাচতেই যুৱতীগৰাকীৰ চিঞৰ হাবিত শুনিছিল কেইজনমান যুৱকে ৷ চিঞৰ শুনি তিনিজন যুৱকে যুৱতীগৰাকীক উদ্ধাৰ কৰি আৰক্ষীক খবৰ দিয়ে ৷ বনগাঁও আৰক্ষীয়ে যুৱতীগৰাকীক চিকিৎসাৰ বৱস্থা কৰি এই গোটেই ঘটনাৰ তদন্ত আৰম্ভ কৰে ৷ 

ইতিমধ্যে পুৱাৰ ভাগতে সংঘটিত হোৱা এই ঘটনাৰ মূল অভিযুক্তক চিনাক্ত কৰিছে মাজুলী আৰক্ষীয়ে । ইয়াৰ পূৰ্বেও ধৰ্ষণ সম্বন্ধীয় অভিযোগত আৰক্ষীৰ জিম্মাত আছিল অভিযুক্তগৰাকী ৷ কিন্তু আৰক্ষীৰ জিম্মাৰ পৰা ঘৰলৈ অহাৰ পিচতে পুনৰ সংঘটিত কৰিলে এই জঘন্যকাণ্ড ৷ আনহাতে আৰক্ষীয়ে গ্ৰেপ্তাৰ কৰিছে ই-ৰিক্সাৰ চালকজনক ।