Molestation Charges: বিদ্যুতৰ বিল দিবলৈ গৈ মহিলাৰ শ্লীলতা হানিৰ চেষ্টা APDCL ৰ কৰ্মচাৰীৰ - চাবুৱা থানা
মৰাণ, 11 আগষ্ট : ডিব্ৰুগড় জিলাৰ চাবুৱাৰ ৰজাবাৰী গাৱঁত সংঘটিত হৈছে চাঞ্চল্যকৰ ঘটনা । বিদ্যুতৰ বিল দিবলৈ গৈ APDCL ৰ কৰ্মচাৰীয়ে মহিলাৰ শ্লীলতা হানিৰ চেষ্টা কৰাৰ ভয়ংকৰ অভিযোগ উত্থাপন হৈছে ৷ অভিযোগ অনুসৰি, বিদ্যুৎ বিভাগৰ কৰ্মচাৰী কৃষ্ণ কোঁৱৰে বৃহস্পতিবাৰে দিনৰ ভাগত ২০ মাইলৰ নিবাসী এজন ব্যক্তিৰ ঘৰত বিদ্যুতৰ বিল দিব গৈছিল ৷ সেই সময়ত ঘৰখনত অকলে আছিল ঘৰখনৰ মহিলাগৰাকী ।
ঘৰত অকলে থকাৰ সুযোগ লৈ কৰ্মচাৰীজনে জোৰ জবৰদস্তি কৰি মহিলাগৰাকীৰ হাতত ধৰাৰ অভিযোগ উত্থাপিত কৰিছে মহিলাগৰাকীয়ে । কেৱল হাতত ধৰাই নহয় বাৰে বাৰে মহিলাগৰাকীক অশ্লীল ইংগিত দি থকাৰো অভিযোগ তুলিছে । আনহাতে ভুক্তভোগী মহিলাগৰাকীয়ে কৰ্মচাৰীজনৰ বিৰুদ্ধে চাবুৱা থানাত এজাহাৰ দাখিল কৰিছে । মহিলাগৰাকীয়ে বিদ্যুৎ বিভাগৰ পৰা এনেধৰণৰ অসৎ চৰিত্ৰৰ কৰ্মচাৰী আঁতৰাওক বুলি দাবী উত্থাপন কৰিছে ৷
আনহাতে বিদ্যুৎ বিভাগৰ বিষয়াই জানিবলৈ দিয়া অনুসৰি, বিদ্যুতৰ বিল বেছি অহা বুলি অভিযুক্ত মহিলাগৰাকীৰ স্বামীয়ে বিদ্যুতৰ বিল দিবলৈ যোৱা কৰ্মচাৰীজনক আক্ৰমণ কৰাৰ লগতে মটৰ চাইকেলখন ভাঙি পেলায় । এতিয়া অভিযোগ প্ৰতি-অভিযোগ চলিছে দুই পক্ষৰ মাজত। চাবুৱা আৰক্ষীয়ে ঘটনাটো তদন্ত কৰাৰ পাচতহে ঘটনাৰ প্ৰকৃত ৰহস্য পোহৰলৈ আহিব ।
লগতে পঢ়ক:Nitesh Kumar Murder case: দাৰে ডিঙি কাটি হত্যা কৰা হৈছিল নীতেশ কুমাৰক