কংগ্ৰেছৰ সভাপতি নিৰ্বাচন সন্দৰ্ভত সঞ্জয় নিৰুপমৰ সৈতে আছুতীয়া সাক্ষাৎকাৰ - ছোনিয়া গান্ধী

বহুমত যুক্ত এখন চিঠিৰে কংগ্ৰেছৰ সভাপতি পদৰ বাবে নিৰ্বাচন অনুষ্ঠিত কৰিব খোজাটো ৰাহুল গান্ধীৰ বিৰুদ্ধে এক ষড়যন্ত্ৰ আৰু এনে ধৰণে চলি থাকিলে কংগ্ৰেছ দল বিভক্ত হ’ব ৷ জ্যেষ্ঠ সাংবাদিক অমিত অগ্নিহোত্ৰীৰ সৈতে হোৱা এক সাক্ষাৎকাৰত এই মন্তব্য কৰে কংগ্ৰেছৰ জ্যেষ্ঠ নেতা সঞ্জয় নিৰুপমে ৷ সাক্ষাৎ কালত তেখেতক সোধা হৈছিল যে, কংগ্ৰেছৰ মাজত নেতৃত্বৰ বিষয়টোক লৈ কিয় তৰ্ক-বিতৰ্ক আৰম্ভ হৈছে ৷ ইয়াৰ উত্তৰত সঞ্জয় নিৰুপমে কয় যে, 2019 বৰ্ষৰ লোকসভা নিৰ্বাচনৰ পাচত যেতিয়া ৰাহুল গান্ধীয়ে পদত্যাগ কৰিছিল, তেতিয়াৰ পৰাই এই তৰ্কযুদ্ধ আৰম্ভ হৈছিল ৷ ৰাহুল গান্ধীয়ে নেতৃত্ব লৈছিল যদিও ইয়াক চলায় নিব খোজা নাছিল ৷ তেওঁ বিচাৰিছিল গান্ধী পৰিয়ালৰ বাহিৰৰ কোনোবাই দলৰ নেতৃত্ব বহন কৰক ৷ সেই ব্যক্তিগৰাকীৰ সন্ধান বৰ্তমানেও অব্যাহত আছে বুলি জনায় নিৰুপমে ৷ আনহাতে, যেতিয়া ছোনিয়া গান্ধীক অন্তৱৰ্তীকালিন অধ্যক্ষ হিচাপে দায়িত্ব পালন কৰিবলৈ কোৱা হৈছিল তেতিয়াৰ পৰাই কংগ্ৰেছৰ পৰৱৰ্তী সভাপতি কোন হ’ব তাক লৈ তৰ্ক-বিতৰ্ক আৰম্ভ হৈছিল ৷ আনহাতে, কংগ্ৰেচৰ বহুকেইগৰাকী জ্যেষ্ঠ সদস্যই পত্ৰ প্ৰেৰণ কৰি ছোনিয়া গান্ধীক সম্পূৰ্ণৰূপে অধ্যক্ষ পদ গ্ৰহণৰ বাবে আহ্বান জনাইছিল ৷ এই প্ৰকিয়াক ষড়যন্ত্ৰৰ আখ্যা দিয়াৰ কাৰণ কি বুলি সোধা প্ৰশ্নৰ উত্তৰত সঞ্জয় নিৰুপমে কয় যে, বিষয়টোক লৈ কোনো সমস্যা নাই ৷ যিকোনো এটা সক্ৰিয় ৰাজনৈতিক দলত এগৰাকী পূৰ্ণকালিন অধ্যক্ষ থকা উচিত ৷ কিন্তু এই চিঠিখন কংগ্ৰেছ আৰু গান্ধী পৰিয়ালক অস্তিত্বহীন কৰা ষড়যন্ত্ৰৰ এক অংশ ৷ দিল্লীৰ বাসগৃহ আৰু কাৰ্যালয়তো ৰাহুলৰ বিৰুদ্ধে পূৰ্বেও বহু দলীয় নেতাই এনে ষড়যন্ত্ৰ ৰচিছিল ৷ এতিয়াই এই নিৰ্বাচনৰ প্ৰয়োজন নাই ৷ কিয়নো ইয়াৰ ফলাফলে দলত বিভাজনৰ সৃষ্টি কৰিব পাৰে ৷