সকলোৱে জানে কেন্সাৰ এক জটিল ৰোগ ৷ বেছিভাগ মানুহেই এইটোও জানে যে কেন্সাৰ বহু প্ৰকাৰৰ হ’ব পাৰে আৰু শৰীৰৰ বেছিভাগ অংশতে কেন্সাৰ কোষৰ সৃষ্টি হ’ব পাৰে ৷ কিন্তু সাধাৰণতে বেছিভাগ মানুহেই কেন্সাৰৰ প্ৰকাৰ বা ইয়াৰ লক্ষণসমূহৰ বিষয়ে অৱগত নহয়, যাৰ ফলত ৰোগ চিনাক্তকৰণত আৰু তাৰ পিছত ইয়াৰ চিকিৎসাত পলম হয় ৷ লিম্ফোমা কেন্সাৰও এনে এটা প্ৰকাৰৰ কেন্সাৰ যাৰ বিষয়ে ইয়াৰ সাধাৰণ লক্ষণ বা অন্যান্য আনুষংগিক তথ্যৰ বিষয়ে বহুতৰে বিশেষ সজাগতা নাথাকে ৷
“বিশ্ব লিম্ফোমা সজাগতা দিৱস” প্ৰতি বছৰে ১৫ ছেপ্টেম্বৰত বিশ্বজুৰি পালন কৰা হয়, যাৰ উদ্দেশ্য হৈছে লিম্ফোমা বা লিম্ফ তন্ত্ৰৰ কৰ্কট ৰোগৰ বিষয়ে সাধাৰণ জনতাৰ মাজত সজাগতা বিয়পাই দিয়া ৷ এইবাৰ এই বিশেষ অনুষ্ঠানটো “আমি আমাৰ আৱেগক গুৰুত্ব দিবলৈ অপেক্ষা কৰিব নোৱাৰো” শীৰ্ষক বিষয়বস্তুৰ ওপৰত উদযাপন কৰা হৈছে ৷
লিম্ফোমা কি ?
লিম্ফোমা বা লিম্ফ তন্ত্ৰৰ এই কেন্সাৰ কেতিয়াবা তেজৰ কৰ্কট ৰোগ বুলি গণ্য কৰা হয় কাৰণ ই লিম্ফোচাইট অৰ্থাৎ শ্বেত ৰক্তকণিকাৰ সৈতে জড়িত ৷ কিন্তু ই লিউকেমিয়াৰ পৰা সম্পূৰ্ণ পৃথক কাৰণ এই দুয়োবিধ কেন্সাৰ বিভিন্ন ধৰণৰ কোষৰ পৰা আৰম্ভ হয় ৷
ইয়াক লিম্ফ ন’ডৰ কেন্সাৰ বুলিও কোৱা হয় ৷ লিম্ফোমা আচলতে ৰোগ প্ৰতিৰোধ ক্ষমতাৰ লিম্ফোচাইট (শ্বেত ৰক্তকণিকা) কোষত হয় যিয়ে সংক্ৰমণৰ বিৰুদ্ধে যুঁজ দিয়ে ৷ লিম্ফ ন’ড, প্লীহা, থাইমাছ আৰু হাড়ৰ মজ্জাকে ধৰি শৰীৰৰ বহু অংশত লিম্ফ’চাইট কোষ পোৱা যায় ৷ লিম্ফোমাত এই লিম্ফোচাইটবোৰ দ্ৰুত আৰু অনিয়ন্ত্ৰিতভাৱে বৃদ্ধি হ’বলৈ আৰম্ভ কৰে ৷
লিম্ফোমা হৈছে সম্পূৰ্ণ নিৰাময়যোগ্য কৰ্কট ৰোগ ৷ যদিহে সঠিক সময়ত পৰীক্ষা কৰি চিকিৎসা কৰা হয় ৷ এই কেন্সাৰ প্ৰয়োজনীয় চিকিৎসা আৰু চিকিৎসাৰ অন্তত আৰোগ্য লাভ কৰিব পাৰি ৷
সাধাৰণতে দুবিধ লিম্ফোমা বিবেচনা কৰা হয় ৷ হজকিন লিম্ফোমা আৰু নন-হজকিন লিম্ফোমা ৷ লিম্ফোমাৰ বহুতো উপপ্ৰকাৰো জনা যায় ৷