২০১৯ চনত ভাৰতত ১২ লাখ নতুনকৈ কৰ্কট ৰোগত আক্ৰান্ত হোৱাৰ তথ্য পোহৰলৈ আহিছে ৷ একে সময়তে কৰ্কট ৰোগত আক্ৰান্ত হৈ মৃত্যু হৈছিল ৯.৩ লাখ লোকৰ ৷ আচৰিত কথাটো হ’ল যে এইসকল লোকৰ ৫০ শতাংশতকৈ অধিক লোক ধঁপাতৰ বাবে কৰ্কট ৰোগত আক্ৰান্ত হৈছে আৰু বহুলোকে ইয়াৰ ফলত নিজৰ প্ৰাণো হেৰুওৱাবলগীয়া হৈছিল ৷
শেহতীয়াকৈ ‘দ্য লেন্সেট ৰিজিঅ’নেল হেল্থ চাউথইষ্ট এছিয়া’ নামৰ আলোচনীখনত প্ৰকাশিত এক অধ্যয়নত এই কথা পোহৰলৈ আহিছে ৷ গৱেষকসকলে এই কথা জানিব পাৰিছে যে এছিয়াত চীন আৰু জাপান কৰ্কট ৰোগৰ সংখ্যা বৃদ্ধি আৰু ইয়াৰ ফলত হোৱা মৃত্যুৰ ক্ষেত্ৰত ভাৰতৰ পিছ পৰি থকা নাই ৷
গৱেষকসকলৰ মতে, ২০১৯ চনত এছিয়াত কেন্সাৰ জনস্বাস্থ্যৰ প্ৰতি এক উল্লেখযোগ্য ভাবুকি হৈ পৰিছিল, য’ত ৯৪ লাখ নতুনকৈ আক্ৰান্ত হোৱাৰ লগতে ৫৬ লাখ লোকৰ মৃত্যু হৈছিল ৷ ইয়াৰে চীনত সৰ্বাধিক ৪৮ লাখ নতুন কৰ্কট ৰোগত আক্ৰান্ত হোৱাৰ লগতে ২৭ লাখ লোকৰ মৃত্যু হৈছে ৷
জাপানত প্ৰায় ৯ লাখ নতুনকৈ কৰ্কট ৰোগত আক্ৰান্ত হোৱাৰ লগতে ৪.৪ লাখ লোকৰ ইতিমধ্যে মৃত্যু হৈছে ৷ আন্তঃৰাষ্ট্ৰীয় গৱেষকৰ দলটোত ৰাষ্ট্ৰীয় প্ৰযুক্তিবিদ্যা প্ৰতিষ্ঠান কুৰুক্ষেত্ৰ আৰু অল ইণ্ডিয়া ইনষ্টিটিউট অৱ মেডিকেল ছায়েন্স যোধপুৰ আৰু বাথিণ্ডাৰ গৱেষকসকলো অন্তৰ্ভুক্ত কৰা হৈছিল ৷ তেওঁলোকে তেওঁলোকৰ অধ্যয়নত লিখিছে, “আমি ১৯৯০ চনৰ পৰা ২০১৯ চনৰ ভিতৰত এছিয়াৰ ৪৯খন দেশত ২৯ প্ৰকাৰৰ কৰ্কট ৰোগৰ টেম্প’ৰেল পেটাৰ্ণ পৰীক্ষা কৰিলোঁ ৷”
গৱেষকসকলৰ মতে, এছিয়াত কেন্সাৰ বেছিকৈ শ্বাসনলী, ব্ৰংকাছ আৰু হাওঁফাওঁ (TBL)ত দেখা গৈছিল ৷ আনুমানিক ১৩ লাখ লোক আক্ৰান্ত হোৱাৰ লগতে ১২ লাখ লোকৰ এই ৰোগত মৃত্যু হৈছে ৷ এই অংগসমূহৰ কৰ্কট ৰোগৰ বেছিভাগেই পুৰুষৰ ক্ষেত্ৰত পোৱা গৈছিল ৷
গৱেষকসকলে কয় যে, বিশেষকৈ মহিলাৰ মাজত ছাৰ্ভাইকেল কেন্সাৰৰ ৰোগীয়ে দ্বিতীয় স্থান আৰু এছিয়াৰ বহু দেশত শীৰ্ষ পাঁচটা স্থানত আছে ৷ ২০০৬ চনত প্ৰৱৰ্তন কৰা হিউমেন পেপিলোমা ভাইৰাছ (HPV) ভেকচিন ৰোগ প্ৰতিৰোধ আৰু এইচ পি ভি সম্পৰ্কীয় মৃত্যু হ্ৰাস কৰাত ফলপ্ৰসূ বুলি প্ৰমাণিত হৈছে ৷
তেওঁ কয় যে, কৰ্কট ৰোগৰ বাবে দায়ী ৩৪টা কাৰকৰ ভিতৰত ধূমপান, মদ্যপান আৰু প্ৰদূষক পদাৰ্থ প্ৰধান কাৰক হিচাপে পোৱা গৈছে ৷ তেওঁ নিজৰ অধ্যয়নত কয়, “এছিয়াত পৰিৱেশৰ বায়ু প্ৰদূষণ বৃদ্ধি পোৱাৰ বাবে কৰ্কট ৰোগৰ প্ৰাদুৰ্ভাৱ খুবেই চিন্তনীয় ৷”
গৱেষকসকলৰ মতে, ভাৰত, বাংলাদেশ আৰু নেপালৰ দৰে দক্ষিণ এছিয়াৰ দেশত খৈনী, গুটখা, পান মছলা ৰূপত ধঁপাত সেৱন কৰাটো চিন্তাৰ বিষয় ৷ ২০১৯ চনত বিশ্বৰ মুঠ মৃত্যুৰ ভিতৰত ভাৰতত ৩২.৯ শতাংশ মৃত্যু হোৱাৰ বিপৰীতে ২৮.১ শতাংশ নতুনকৈ ওঁঠ আৰু মুখৰ কৰ্কট ৰোগত আক্ৰান্ত হৈছে ৷ তেওঁ কয় যে, ‘মুখৰ কৰ্কট ৰোগৰ ৫০ শতাংশতকৈ অধিক ৰোগী ধঁপাত সেৱনৰ সৈতে জড়িত ৷ শেহতীয়াকৈ ভাৰতকে ধৰি দক্ষিণ এছিয়াত ইয়াৰ ধাৰা বৃদ্ধি পাইছে ৷
লগতে পঢ়ক:দেশত Covidৰ লগতে ইনফ্লুৱেঞ্জা ফ্লুৰ আশংকা বৃদ্ধি; ইয়াৰ লক্ষণ তথা নিদান জানি লওক
