নিউজ ডেস্ক, 5 জানুৱাৰী: শুকুৰবাৰে কেন্দ্ৰীয় স্বাস্থ্য মন্ত্ৰণালয়ৰ তথ্য অনুসৰি ভাৰতত বিগত 24 ঘন্টাত ৭৬১ গৰাকী ক’ভিড-১৯ আক্ৰান্ত হোৱাৰ বিপৰীতে ভাইৰাছজনিত ৰোগৰ বাবে ১২ জন লোকৰ মৃত্যু হৈছে ৷
পুৱা ৮ বজাত কেন্দ্ৰীয় স্বাস্থ্য মন্ত্ৰণালয়ে আপডেট কৰা তথ্য অনুসৰি বৃহস্পতিবাৰে দেশত সক্ৰিয় ক’ভিড-১৯ আক্ৰান্তৰ সংখ্যা ৪,৪২৩ৰ পৰা ৪,৩৩৪জনলৈ সামান্য হ্ৰাস পাইছে ৷ ইফালে, কেৰালাত সৰ্বাধিক সক্ৰিয় ৰোগীৰ সংখ্যা ১,২৪৯, তাৰ পিছতে কৰ্ণাটকত ১২৪০, মহাৰাষ্ট্ৰত ৯১৪, তামিলনাডুত ১৯০, আৰু ছত্তীশগড় আৰু অন্ধ্ৰপ্ৰদেশত ১২৮ জন ৷
তথ্য অনুসৰি ১২ জনৰ নতুনকৈ মৃত্যু হোৱা লোকৰ ভিতৰত ৫ জন কেৰালাৰ, ৪ জন কৰ্ণাটকৰ, ২ জন মহাৰাষ্ট্ৰৰ আৰু এজন উত্তৰ প্ৰদেশৰ বুলি জানিব পৰা গৈছে ৷ ৫ ডিচেম্বৰলৈকে দৈনিক আক্ৰান্তৰ সংখ্যা দুটা সংখ্যাৰ ঘৰত আহিছিল যদিও ঠাণ্ডা বতৰৰ মাজত আৰু নতুন ক’ভিড-১৯ ভেৰিয়েণ্টৰ উত্থানৰ পিছত পুনৰ এই সংক্ৰমণ বৃদ্ধি পাবলৈ ধৰিলে ৷
শুকুৰবাৰে চৰকাৰী সূত্ৰই প্ৰকাশ কৰা অনুসৰি, ৪ জানুৱাৰীলৈকে ১২খন ৰাজ্যৰ পৰা ক’ভিড-১৯ৰ উপ-ভেৰিয়েণ্ট জেএন.১ত আক্ৰান্তৰ সংখ্যা ৬১৯লৈ বৃদ্ধি পাইছে ৷ কৰ্ণাটকৰ পৰা ১৯৯ জন, কেৰালাৰ ১৪৮ জন, মহাৰাষ্ট্ৰৰ ১১০ জন, গোৱাৰ ৪৭ জন, গুজৰাটৰ ৩৬ জন, অন্ধ্ৰ প্ৰদেশৰ পৰা ৩০ জন, তামিলনাডুৰ ২৬ জন, দিল্লীৰ ১৫ জন, ৰাজস্থানৰ পৰা ৪ জন, তেলেংগানাৰ পৰা ২ জন আৰু ওড়িশা আৰু হাৰিয়ানাৰ পৰা এজনকৈ ক’ভিড-১৯ত আক্ৰান্ত হোৱা বুলি জানিবলৈ দিয়ে ৷
দেশত ক’ভিড আক্ৰান্তৰ সংখ্যা বৃদ্ধি আৰু জেএন.১ উপ-ভেৰিয়েণ্টত আক্ৰান্ত ৰোগী ধৰা পৰাৰ মাজতে ৰাজ্য আৰু কেন্দ্ৰীয় শাসিত অঞ্চলসমূহক অহৰহ সতৰ্কতা বজাই ৰাখিবলৈ কেন্দ্ৰই ইতিমধ্যে সকিয়াই দিছে ৷ কেন্দ্ৰীয় স্বাস্থ্য আৰু পৰিয়াল কল্যাণ মন্ত্ৰণালয়ে আগবঢ়োৱা ক’ভিড-১৯ৰ নিয়মাৱলীসমূহ সূচাৰুৰূপে পালন কৰিবলৈ ইতিমধ্যে ৰাজ্যসমূহক নিৰ্দেশনাৱলী জাৰি কৰা হৈছে ৷
লগতে পঢ়ক:শীতকালত শিশুক সুৰক্ষা প্ৰদান কৰে প্ৰকৃতিৰ অমূল্য উপহাৰ মাতৃদুগ্ধই
