ওদালগুৰি, 11 অক্টোবৰঃ ওদালগুৰিৰ মাজবাটত সেনা আৰক্ষীৰ অভিযানত জালত পৰিল অস্ত্ৰ সহ যুৱক । যুৱক জনৰ পৰা এটা ২.২ পিষ্টল, এটা মেগজিন, দুই জাই সজীৱ গুলীৰ লগতে অপত্তি জনক সামগ্ৰী উদ্ধাৰ কৰে অভিযানকাৰী দলটোৱে । ধৃত যুৱকজনৰ নাম কাৰ্তিক গৌড় । ইফালে কাৰ্তিক গৌড়ৰ ঘৰত সেনা আৰু আৰক্ষীয়ে অভিযান চলাই পিষ্টল সহ দুই জাই সজীৱ গুলি উদ্ধাৰ কৰা ঘটনাক পৰিয়ালৰ লোকে সেনাৰ পৰিকল্পিত নাটক হিচাপেহে আখ্যা দিয়ে । পৰিয়ালৰ লোকৰ ভাষ্য অনুসৰি, বৃহস্পতিবাৰে নিশা কাৰ্তিক গৌড়ৰ পৰিয়ালৰ লোকে শুই থকা সময়ত এজন অচিনাক্ত লোকে কাৰ্তিক গৌড়ৰ ঘৰত স্কুটী ৰখাই কাৰ্তিক গৌড়ক মাত দিয়ে । কিন্তু কাৰ্তিক গৌড় শুই থকাৰ বাবে কাৰ্তিক গৌড়ৰ বৃদ্ধা মাতৃ ওলাই আহে ।
ওদালগুৰিত অস্ত্ৰসহ আটক যুৱক কাৰ্তিক গৌড়ৰ বৃদ্ধা মাতৃয়ে দৰ্জা খুলি দিয়াৰ লগে লগে পানী খাবৰ বাবে অচিনাক্ত লোকজন ঘৰৰ ভিতৰত প্ৰবেশ কৰে । কাৰ্তিক গৌড়ৰ মাতৃক পানী আনিবলৈ কৈ ঘৰৰ ভিতৰত বহি থাকে অচিনাক্ত লোকজন ৷ যুৱকজনৰ মাতৃয়ে পানী অনাৰ পূৰ্বেই ঘৰৰ ভিতৰৰ পৰা ওলাই আহে অচিনাক্ত লোক জন । তাৰ কিছু সময় পাচতেই কাৰ্তিক গৌড়ক বিছাৰি সেনাৰ দল এটা তেওঁলোকৰ ঘৰত উপস্থিত হয় । কাৰ্তিক গৌড়ৰ ঘৰত তালাচী চলাই সেনা-আৰক্ষীৰ দলটোৱে পাছত কাৰ্তিক গৌড়ৰ বৃদ্ধা মাকৰ কোঠাৰ পৰা উদ্ধাৰ কৰে এটা ২.২ পিষ্টল সহ দুই জাই সজীৱ গুলী আৰু এটা মেগজিন ।
আনহাতে, অস্ত্ৰ উদ্ধাৰৰ ঘটনা সন্দৰ্ভত সেনাই মাজবাট থানাত এজাহাৰ দাখিল কৰে যুৱক বিৰুদ্ধে । এজাহাৰৰ পাচতে শুকুৰবাৰে মাজবাট আৰক্ষীয়ে যুৱক জনক ওদালগুৰিৰ আদালতত হাজিৰ কৰি জেল হাজোতলৈ প্ৰেৰণ কৰে ।
