ওদালগুৰি, 29 জানুৱাৰীঃ সোমবাৰে স্বাক্ষৰিত হোৱা তৃতীয় বড়ো শান্তি চুক্তিৰ পিচতে অন্ত পৰিল দীৰ্ঘদিনীয়া সমস্যাৰ ৷ সোমবাৰ অৰ্থাৎ 27 জানুৱাৰী 2020-ত বড়ো সশস্ত্ৰ সংগঠন নেশ্যনেল ডেম’ক্ৰেটিক ফ্ৰন্ট চমুকৈ এনডিএফবিৰ আলোচনা পন্থীৰ নেতৃত্বত অইন সশস্ত্ৰ সংগঠনে কেন্দ্ৰীয় চৰকাৰ আৰু ৰাজ্য চৰকাৰেৰে এক ত্ৰিপাক্ষিক চুক্তি স্বাক্ষৰ কৰে ৷ ত্ৰিপাক্ষিক এই চুক্তিৰ স্বাক্ষৰকাৰী হিচাপে থাকে অসমৰ মুখ্যমন্ত্ৰী সৰ্বানন্দ সোণোৱাল, এনডিএফবিৰ চাৰিওটা গোটৰ শীৰ্ষ নেতৃত্ব, নিখিল বড়ো ছাত্ৰ সন্থাৰ শীৰ্ষ নেতৃত্ব আৰু কেন্দ্ৰীয় চৰকাৰ ৷ এই চুক্তি স্বাক্ষৰ কৰি গৃহভূমিত উপস্থিত হয় সকলো বড়ো নেতাসকল ৷
মঙলবাৰে ওদালগুৰি ৰাজহুৱা দূৰ্গা পূজাৰ খেলপথাৰত অনুষ্ঠিত হোৱা এক সভাত এবছুৰ সভাপতি প্ৰমোদ বড়ো আৰু এনডিএফবি প্ৰগতিশীলৰ সভাপতি গোবিন্দ বসুমতাৰীৰসহ কেইবাজনো নেতাক উষ্ম আদৰনি জনোৱা হয় ৷ বিভিন্ন দল সংগঠনে ফুলাম গামোছা, আৰনাই, ফুলৰ থোপা আদিৰে সম্বৰ্ধনা জনাই ৷ সম্বৰ্ধনা অনুষ্ঠানত উপস্থিত হৈ ৰাইজক সম্বোধন কৰি দিয়া ভাষনত প্ৰমোদ বড়োয়ে তৃতীয় শান্তি বড়ো চুক্তিত ঐতিহাসিক চুক্তি বুলি আখ্যা দি এই চুক্তিৰ জৰিয়তে 34 বছৰীয়া সশস্ত্ৰ সংগ্ৰামৰ অৱসান ঘটাই এই অঞ্চললৈ শান্তি ঘূৰি আহিব বুলি আশা প্ৰকাশ কৰে ৷ এই চুক্তি কেৱল বড়োসকলৰ বাবেই নহয় সকলো জাতি জনগোষ্ঠীৰ বাবে কোনো লোকে ভয় বা শংকাত ভোগাৰ আশংকা নাই বুলি বড়োভূমিৰ অবড়ো লোকসকলক তেওঁ আশ্বাস প্ৰদান কৰে ৷ তেওঁ এই শান্তি চুক্তিৰ জৰিয়তে হাগ্ৰামা মহিলাৰীক কটাক্ষ কৰি কয় এনডিএফবিক কোনেও হাইজেক নোৱাৰে, কিন্তু হাগ্ৰামা মহিলাৰীয়ে এনডিএফবিক বিভাজন কৰি এই চুক্তিৰ কৃতিত্ব ল’ব বিচাৰিছে। এই সম্বৰ্ধনা অনুষ্ঠানতে এনডিএফবি প্ৰগতিশীলৰ সভাপতি গোবিন্দ বসুমতাৰীয়ে এই চুক্তিৰ জৰিয়তে 34 বছৰীয়া সশস্ত্ৰ সংগ্ৰাম কৰা যুৱক-যুৱতী সকলে সমাজত স-সন্মানে সকলোৱে জীয়াই থকাৰ অধিকাৰ লাভৰ আশা প্ৰকাশ কৰে ৷