ওদালগুৰিত বন্যহস্তীয়ে প্ৰাণ কাঢ়িলে এজনৰ

ওদালগুৰিত অব্যাহত আছে বন্যহস্তীৰ তাণ্ডৱ ৷ জিলাখনৰ ভোলাচাৰত সংঘটিত হ'ল এই ঘটনা ৷

ওদালগুৰি, 7 ছেপ্তেম্বৰ:ওদালগুৰি জিলাৰ ভাৰত-ভূটান সীমান্ত অঞ্চল সমূহত অব্যাহত আছে হাতী মানুহৰ সংঘাত । যাৰ ফলত এতিয়া অঞ্চলটোত এজনৰ পাচত আন এজন লোকে হেৰুৱাইছে প্ৰাণ ৷ শনিবাৰে পুৱতি নিশা ওদালগুৰিৰ ডিমাকুছি থানাৰ অন্তৰ্গত অসম-ভূটান সীমান্তৰ ২নং ভোলাটাৰ গাৱঁত বন্যহস্তীৰ আক্ৰমণত মৃত্যু হয় এজন লোকৰ৷ নিহত লোকজনক ৭৩ বছৰীয়া ৰাম বাহাদুৰ গৌতম বুলি চিনাক্ত কৰা হৈছে ৷ পুৱতি নিশা প্ৰায় ৩ বজাত ভূটান সীমান্তৰ বনাঞ্চলৰ পৰা খাদ্যৰ সন্ধানত ৰাজহ গাঁৱলৈ ওলাই অহা বনৰীয়া হাতীৰ জাকৰ এটা অকলশৰীয়া হাতীয়ে ৰাম বাহাদুৰ গৌতম নামৰ লোকজন আক্ৰমণ কৰি গুৰুত্বৰভাবে আহত কৰে ৷ পাছত আহত লোকজনক চিকিৎসাৰ বাবে টংলা সামূহিক চিকিৎসালয়ত ভৰ্তি কৰোৱা হৈছিল যদিও যদিও চিকিৎসালয়তে তেওঁৰ মৃত্যু ঘটে ৷

উল্লেখযোগ্য যে কেৱল ওদালগুৰি জিলাতে হাতী আৰু মানুহৰ সংঘাতত বৰ্তমানলৈকে 19 লোকে প্ৰাণ হেৰুৱাইছে যদিও বিটিচি প্ৰশাসন আৰু অসম চৰকাৰে হাতী-মানুহৰ সংঘাত ৰোধ কৰাৰ বাবে একো ফলপ্ৰসূ আঁচনি গ্ৰহণ কৰা নাই ৷ যাৰ ফলস্বৰূপে জিলাখনৰ উত্তৰাঞ্চলত এতিয়া হাতী-মানুহৰ সংঘাতে তীব্ৰ ৰূপ ধাৰণ কৰিছে ৷