ওদালগুৰি, 26 ডিচেম্বৰঃ CAA বিৰোধী আন্দোলনত গুৱাহাটীত নিৰাপত্তাৰক্ষীৰ গুলীত মৃত্যু হোৱা ওদালগুৰি জিলাৰ মাজুলি চাহ বাগিছাৰ শ্বহীদ ঈশ্বৰ নায়কৰ ঘৰত আজি উপস্থিত হয় আছুৰ মুখ্য উপদেষ্টা সমুজ্জ্বল কুমাৰ ভট্টাচাৰ্য সহ আছুৰ এটা বৃহৎ দল। আছুৰ মুখ্য উপদেষ্টাগৰাকীয়ে শোক সন্তপ্ত পৰিয়ালটোক সমবেদনা জনোৱাৰ লগতে শ্বহীদ গৰাকীক শ্ৰদ্ধাঞ্জলি জ্ঞাপন কৰে ৷
অসমৰ ৬ জনকৈ যুৱকক কিয় হত্যা কৰা হ'ল বুলি অসম চৰকাৰ তথা সৰ্বানন্দ সোণোৱাল আৰু হিমন্ত বিশ্ব শৰ্মাক প্ৰশ্ন কৰে সমুজ্জ্বল কুমাৰ ভট্টাচাৰ্যই। ইয়াৰ সঠিক তদন্ত দাবী কৰাৰ লগতে হত্যা কৰা দোষীক শাস্তি দিবলৈ দাবী জনায় ছাত্ৰ নেতা গৰাৰীয়ে। শ্বহীদৰ ত্যাগক অথলে যাব নিদিওঁ বুলিও মন্তব্য কৰে ছাত্ৰ নেতা গৰাকীয়ে ৷ আনহাতে, বিজেপিৰ শান্তি সমদল সন্দৰ্ভত প্ৰতিক্ৰিয়া প্ৰকাশ কৰি ছাত্ৰনেতা গৰাকীয়ে কয়, ৰাজপথত খোজকাঢ়িলেই অসমত স্থায়ী শান্তি নাহে । CAA বাতিল কৰি অসমৰ প্ৰত্যেকজন খিলঞ্জীয়া মানুহৰ হৃদয়ত জ্বলি থকা এই অশান্তিৰ জুইকুৰা নুমাওঁক। ইপিনে ইনাৰ লাইন পাৰ্মিত সন্দৰ্ভতো মন্তব্য কৰে আছুৰ মুখ্য উপদেষ্টা গৰাকীয়ে । ভট্টাচাৰ্যই সাংবাদিৰ আগত কয় যে, অসমত কেইবাখনো জিলাত ইনাৰ লাইনৰ ব্যৱস্থাৰ নিয়ম আছিল, কিন্তু প্ৰযোজ্য হোৱা নাছিল । শেহতীয়াকৈ কেন্দ্ৰীয় চৰকাৰে অসমৰ যিবোৰ জিলাত ইনাৰ লাইন দিয়াৰ সুবিধা আছিল, কেৱল পৰিসৰ বৃদ্ধিৰ প্ৰয়োজনত তাক বাতিল কৰিছে । এইটো কেন্দ্ৰীয় চৰকাৰৰ অসমৰ প্ৰতি চূড়ান্ত অন্যায় আৰু অবিচাৰ আৰু অসম চৰকাৰৰ দিল্লীৰ ওচৰত চূড়ান্ত আত্মসমৰ্পন বুলি মন্তব্য কৰে।
লগতে পঢ়ক- জুবিন গাৰ্গৰ প্ৰতি কোনো আক্ষেপ নাই কলিতা জনগোষ্ঠীৰ
