ওদালগুৰি,12 জানুৱাৰীঃওদালগুৰিত পুৱতি নিশা আৰক্ষীৰ সফল অভিযান ৷ ৰৌতাৰ ১৫ নং ৰাষ্ট্ৰীয় ঘাইপথত আৰক্ষীয়ে জব্দ কৰিবলৈ সক্ষম হয় এখন অবৈধ সুৰা ভৰ্তি ট্ৰাক ৷ লগতে আটক কৰে উত্তৰ প্ৰদেশৰ দুজন যুৱকক ৷
প্ৰাপ্ত তথ্য মতে, গোপন সূত্ৰৰ তথ্যৰ ভিত্তিত শনিবাৰে নিশা ৰৌতা আৰক্ষী থানাৰ ভাৰপ্ৰাপ্ত আৰক্ষী বিষয়া হেমন্ত বৰুৱাৰ নেতৃত্বত আৰক্ষীৰ দল এটাই ৰাষ্ট্ৰীয় ঘাইপথটিত তালাচী চলায় ।পুৱা 5 মান বজাত UP 21 CN-2181 নম্বৰৰ ট্ৰাক এখনত আৰক্ষীৰ দলটোৱে তালাচী চলাব বিচৰাত চালকজনে ট্ৰাকখনত প্ৰসাধন সামগ্ৰী থকা বুলি উল্লেখ কৰে ৷ লগতে এখন চালানো প্ৰদৰ্শন কৰে চালকজনে । কিন্তু চালকজনৰ কথাত পতিয়ন নগৈ আৰক্ষীয়ে ট্ৰাকখনত তালাচী চলাই জব্দ কৰে প্ৰায় ৪০ লাখৰো অধিক মূল্যৰ প্ৰায় ১,০০০ কাৰ্টুন বিলাতী সুৰা ৷