ওদালগুৰিত আলফা সন্দেহত এজনক আটকঃ অভিযোগ নাকচ পৰিয়ালৰ

মঙলবাৰে ভাৰতীয় সেনাৰ গোৰ্খা ৰেজিমেন্টে ওদালগুৰি জিলাৰ পৰা আটক কৰে ৰবিৰাম বড়ো নামৰ এগৰাকী লোকক ৷ সেনাৰ বিৰুদ্ধে ভুৱা আলফা সজাই সেনাই লোকজনক গ্ৰেপ্তাৰ কৰাৰ অভিযোগ উত্থাপন কৰিলে পৰিয়ালৰ লোকে ৷

ওদালগুৰি, 10 জুলাইঃ ওদালগুৰিত আলফা (স্বাধীন) ৰ সদস্যৰ সন্দেহত এজন লোকক আটক কৰাৰ বিপৰীতে পৰিয়ালৰ লোকে এয়া ষড়যন্ত্ৰ বুলি অভিযোগ উত্থাপন কৰিছে ৷ ওদালগুৰিৰ গোপচাৰ চুবাত ভাৰতীয় সেনাৰ গোৰ্খা ৰেজিমেন্টে আটক কৰে ৰবিৰাম বড়ো নামৰ এগৰাকী লোকক ৷ সেনাৰ দলটোৱে মঙলবাৰে নিজ গৃহৰ পৰাই আটক কৰিছিল ৰবিৰাম বড়োক ৷ বড়োৰ বাসগৃহৰ ভঁৰালগৃহৰ পৰা সেনাই জব্দ কৰিছিল চীনত নিৰ্মিত এটা 2.2 পিষ্টলৰ লগতে মেগজিনসহ দুই জাঁই সজীৱ গুলী ৷

ইপিনে সেনাৰ গোৰ্খা ৰেজিমেন্টৰ মেজৰ ৰাম বাহাদুৰ থাপাই বড়োৰ বিৰুদ্ধে এক পৰিকল্পিত ষড়যন্ত্ৰ ৰচনা কৰা বুলি অভিযোগ কৰিছে পৰিয়ালৰ লোকে ৷ দিন হাজিৰা কৰি জীৱন নিৰ্বাহ কৰা ৰবিৰাম বড়ো কোনোপধ্যেই আলফাৰ সদস্য নহয় বুলি কয় পৰিয়ালৰ লোকে ৷