ৰাইজে বিপিএফক ১৭ বছৰ দিলে আমাক ৫ বছৰ দিয়কঃ প্ৰমোদ বড়ো

শুকুৰবাৰে ওদালগুৰিত অনুষ্ঠিত হোৱা যোগদান সভাত ৬ শতাধিক প্ৰাক্তন এনডিএফবি নেতা কৰ্মী সহ এক সহস্ৰাধিক লোকে ইউপিপিএলত যোগদান কৰে । ওদালগুৰিৰ ৰাজহুৱা দূৰ্গাপূজা মণ্ডপত ইউপিপিএলৰ সভাপতি প্ৰমোদ বড়োৰ উপস্থিতিত অনুষ্ঠিত হয় যোগদান কাৰ্যসূচী ৷

ওদালগুৰি, 13 মাৰ্চঃ বিটিচি নিৰ্বাচনৰ দিন চমু চাপি অহাৰ লগে লগে ব্যাপক তৎপৰ হৈ পৰিছে ইউপিপিএল দল । কেৱল বড়ো জনগোষ্ঠীৰ লোকেই নহয় ইউপিপিএল দলত দলে বলে যোগদান কৰিছে বিভিন্ন জনগোষ্ঠীৰ লোকেও । শুকুৰবাৰে ওদালগুৰিৰ ৰাজহুৱা দূৰ্গাপূজা মণ্ডপত ইউপিপিএলৰ সভাপতি প্ৰমোদ বড়োৰ উপস্থিতিত অনুষ্ঠিত হোৱা যোগদান সভাত ৬ শতাধিক প্ৰাক্তন এনডিএফবি নেতা কৰ্মী সহ এক সহস্ৰাধিক লোকে ইউপিপিএলত যোগদান কৰে । ইউপিপিএলত যোগদান কৰা ৬ শতাধিক প্ৰাক্তন এনডিএফবি কেডাৰৰ ভিতৰত এনডিএফবি প্ৰগতিশীল গোটৰ প্ৰায় কেইজন প্ৰাক্তন নেতা কেডাৰৰ লগতে কেইবাজনো এন ডি এফ বি ( আৰ), এন ডি এফ বি ( এছ ) আৰু এন ডি এফ বি ( ডি) গোটৰ প্ৰাক্তন সদস্যও আছে বুলি জনায় গোবিন্দ বসুমতাৰীয়ে ।

যোগদান সমাৰোহত উপস্থিত থাকি ইউপিপিএলৰ সভাপতি প্ৰমোদ বড়োই বিপিএফ দলক ক্ষুৰধাৰ সমালোচনা কৰি বিটিচিত যোৱা ১৭ বছৰত ব্যাপক দুৰ্নীতি সংঘটিত হোৱাৰ অভিযোগ কৰে । নেতা জনে লগতে কয় যে- বিগত ১৭ বছৰত বিপিএফে বিটিচিৰ জনসাধাৰণৰ আশা আকাংক্ষা পূৰণ কৰিব নোৱাৰিলে । বিপিএফ দলটোৱে ৰাইজৰ আস্থাক ল'ব পৰা নাই । সেয়েহে আজি বিটিচিৰ ৰাইজে পৰিৱৰ্তন বিচাৰিছে । ৰাইজে বিপিএফ দলক ১৭ বছৰ দিলে আমাক ৫ বছৰ দিয়ক । আমি সকলো জাতি-জনগোষ্ঠিক লগত লৈ এখন সুন্দৰ বিটিআৰ গঠন কৰিম । নেতা জনে লগতে ইউপিপিএল চৰকাৰ গঠন হলে বিটিচিত সংঘটিত দুৰ্নীতিৰ তদন্ত কৰিব বুলিও মন্তব্য কৰে । ওদালগুৰি জিলাৰ ১০ টা সমষ্টিৰ ভিতৰত ৭ টা সমষ্টিতে ইউপিপিএল দলে জয় লাভ কৰাৰ সম্ভাৱনা আছে বুলিও বড়োই দাবী কৰে । সভাত উপস্থিত থাকি এন ডি এফ বি প্ৰগতিশীলৰ প্ৰাক্তন সভাপতি তথা ভৈৰৱকুণ্ড সমষ্টিৰ প্ৰাৰ্থিত্ব প্ৰত্যাশী গোবিন্দ বসুমতাৰীয়েও বিপিএফ দলক ক্ষুৰধাৰ সমালোচনা কৰে ।

আনহাতে, নেতা জনক ভৈৰৱকুণ্ড সমষ্টি মন্ত্ৰী ৰিহন দৈমাৰীৰ গৃহ সমষ্টি হোৱাত তাত প্ৰত্যাহ্বানৰ সন্মুখীন হ'ব নেকি সাংবাদিকৰ প্ৰশ্নত গোবিন্দ বসুমতাৰীয়ে কয়, "মন্ত্ৰী ৰিহণ দৈমাৰীৰ ৰণ কৌশল হ'ল ধন বল । টকা পইচাৰে ফুচলাই তেখেত সকলে নিৰ্বাচনত প্ৰাৰ্থী জয়ী কৰাৰ চেষ্টা কৰাব । কিন্তু এইবাৰ বতাহ বিপিএফৰ বিৰুদ্ধে আছে । গতিকে এইবাৰ ৰিহণ দৈমাৰীৰ ধনবল কামত নাহিব। লগতে হাগ্ৰামা মহিলাৰীৰ বিপক্ষেও ঢৌ থকা বুলি গোবিন্দ বসুমতাৰীয়ে মন্তব্য কৰাৰ উপৰিও হাগ্ৰামা মহিলাৰী নিৰ্বাচনত পৰজয় হ'ব বুলি দাবী কৰে ।

উল্লেখ্য যে, শুকুৰবাৰে টংলাটো ইউ পি পি এল দলে বিশাল পৰিৱৰ্তন যাত্ৰা বাহিৰ কৰে।

আৰু পঢ়কঃ ত্ৰিপুৰাত ধৰ্মান্তকৰণঃ ইছলাম ধৰ্ম পৰা হিন্দু ধৰ্মলৈ ধৰ্মান্তৰিত পাঁচ গৰাকী