টঙনা চাহ বাগিচাত মালিক-কৰ্মচাৰীৰ সংঘাত

বাগিচাৰ ওচৰতে বজাৰ নিৰ্মাণ কৰোতে অতীজৰে পৰা বসবাস কৰি অহা পাঁচটাকৈ পৰিয়ালৰ ঘৰ-বাৰি ভাঙি দিব বুলি শংকিত হৈ পৰিছে অঞ্চলটোৰ বাসিন্দাসকল, যাৰ ফলত ক্ষোভিত হৈ পৰিছে স্থানীয় লোকসকল ৷

শদিয়া, 9 জুনঃ কাকপথাৰৰ টঙনা চাহ বাগিচাত এখন বজাৰ নিৰ্মাণ কৰাক লৈ মালিকপক্ষ আৰু বাগিচাত কৰ্মৰত বনুৱাসকলৰ মাজত চলিছে তীব্ৰ বিবাদ ৷ বজাৰখন নিৰ্মাণ কৰোতে অতীজৰে পৰা বসবাস কৰি অহা পাঁচটাকৈ পৰিয়ালৰ ঘৰ-দুৱাৰ ভাঙি দিব বুলি শংকিত হৈ পৰিছে অঞ্চলটোৰ বাসিন্দাসকল ৷ যাৰ ফলত ক্ষোভিত হৈ পৰিছে স্থানীয় লোক ৷ বজাৰখন নিৰ্মাণৰ ফলত উত্তম দাস, শ্যামল দে, সুজিৎ দেৱ, মন্টু দাস, শিবচৰণ তাঁতী আৰু ললিত তাঁতী নামৰ লোককেইগৰাকীৰ ঘৰ-বাৰী ভাঙিব বুলি অনুমান কৰি শংকিত হৈ পৰিছিল ৷ বজাৰখন নিৰ্মাণৰ বাবে মাটি পেলাই থকাৰ সময়তে বাগানখনৰ চকীদাৰ জনৈক জন কিষাণে নামৰ ব্যক্তিগৰাকীক উত্তম দাস আৰু শিবচৰণ তাঁতী নামৰ যুৱক দুজনে মাৰপিট কৰে ৷ জন কিষাণে টঙনা আৰক্ষী থানাত এজাহাৰ দাখিল কৰাৰ সময়তে বাগানখনৰ একাংশ মহিলা আৰু পুৰুষে উত্তম দাসৰ ঘৰত প্ৰবেশ কৰি মহিলাক মাৰপিট কৰাৰ লগতে ঘৰৰ বস্তু লণ্ড-ভণ্ড কৰে ৷

উত্তম দাসৰ পৰিয়ালে অভিযোগ কৰা মতে চাহ বাগিচাখনৰ পৰিচালকে ভয় ভাবুকি দেখুৱাই দৰমহা কৰ্তন কৰাৰ ভাবুকি দি উক্ত মহিলা আৰু পুৰুষসকলক ঘৰৰ ভিতৰত প্ৰবেশ কৰোৱাই মাৰপিটত লিপ্ত কৰোৱাই ৷ পৰিচালকে সাংবাদিকৰ আগত জানিবলৈ দিয়া মতে তেওঁলোকে মাৰপিট কৰা জন কিসানৰ পৰিয়ালৰ লোকেহে খঙত এনেধৰণৰ কাৰ্য সংঘটিত কৰিছে আৰু এই কাৰ্যত বাগান কৰ্তৃপক্ষ কোনো জড়িত নহয় ৷ লগতে বজাৰখন নিৰ্মাণ কৰোতে কাৰো কোনোধৰণৰ ক্ষতি নহয়, আগৰ দৰেই সকলোৱে নিজৰ নিজৰ ঘৰত থাকিব পাৰিব বুলি জানিবলৈ দিয়ে ৷ ইতিমধ্যে উত্তম দাসেও টঙনা আৰক্ষী থানাত এজাহাৰ দাখিল কৰিছে বুলি জানিব পৰা গৈছে ৷ টঙনা চাহ বাগিচাৰ নিজৰ মাটিতে তেওঁলোকে বজাৰ নিৰ্মাণ কৰা বুলি জনোৱাৰ উপৰিও বাগানৰ পৰা কোনো ধৰণৰ অনুমতি নোলোৱাকৈ উত্তম দাসে পুখুৰী খান্দিছিল বুলি জানিবলৈ দিয়ে ৷

আৰু পঢ়কঃ সৰভোগত ভয়ংকৰ পথ দুৰ্ঘটনা : আহত ৬