তিনিচুকীয়া, 24 অক্টোবৰ : তিনিচুকীয়া জিলাত সংঘটিত হৈছে এক সন্ধানহীন(Missing)ৰ ঘটনা ৷ 22 অক্টোবৰৰ পুৱা প্ৰায় 9 বজাত কৰ্দৈগুৰি গাঁৱৰ পৰা নিৰুদ্দেশ হৈছে তিনিজনকৈ যুৱক ৷ নিৰুদ্দেশৰ খবৰ লাভ কৰাৰ পাচতে যুৱক তিনিজনৰ পৰিয়ালে বাঘজান থানা(Baghjan Police Station)ত এখন এজাহাৰ দাখিল কৰিছিল ৷
কিন্তু বৰ্তমানলৈকে যুৱক তিনিজনৰ নিৰুদ্দেশৰ সন্দৰ্ভত আৰক্ষীয়ে কোনো তদন্ত আৰম্ভ নকৰাৰ অভিযোগ উত্থাপন হৈছে ৷ সমান্তৰালকৈ উদ্বিগ্ন হৈ পৰিছে সন্ধানহীন যুৱক তিনিজনৰ পৰিয়ালৰ লগতে স্থানীয় ৰাইজ ৷ নিৰুদ্দেশ হোৱা যুৱককেইজন ক্ৰমে দৰ্জিজান গাঁৱৰ সুৰুজ মৰাণ(18), অসীম মৰাণ(19) আৰু এক নং কৰ্দৈগুৰি গাঁৱৰ বিচিত্ৰ মৰাণ(20) ।
নিৰুদ্দেশ হোৱাৰ দুটাকৈ দিন উকলি যোৱাৰ পাচতো আৰক্ষী-প্ৰশাসনে নীৰৱ ভূমিকা গ্ৰহণ কৰা বুলি তিনি যুৱকৰ আত্মীয়ই সংবাদ মাধ্যমযোগে জানিবলৈ দিয়ে ৷ স্থানীয় ৰাইজে সদৰী কৰা মতে, বিষ্ণুপুৰ গাঁৱৰ নিবাসী নিতু মৰাণে(বুদাই) যুৱক তিনিজনক ঘৰৰ পৰা লৈ গৈছিল । তাৰ পাচৰ পৰাই ঘৰলৈ উভতি অহা নাই যুৱককেইজন ৷
যুৱক কেইজনৰ সন্ধানহীন সন্দৰ্ভত নিতুক সোধ-পোছ কৰিবলৈ পৰিয়ালৰ লোকে নিতুৰ ওচৰলৈ কাষ চাপিছিল ৷ কিন্তু সেই সময়তে মটৰ চাইকেল চলাই থকা অৱস্থাত আদবাটৰ পৰাই পলায়ন কৰে নিতুৱে । সেয়েহে যুৱক তিনিজনৰ নিৰুদ্দেশৰ আঁৰত নিতু মৰাণ জড়িত থকাৰ সন্দেহ প্ৰকাশ কৰিছে স্থানীয় ৰাইজে ৷
লগতে পঢ়ক :কলিয়াবৰ কাণ্ডৰ ঘটনাস্থলীত উপস্থিত শিশু অধিকাৰ সুৰক্ষা আয়োগৰ প্ৰতিনিধি
