শদিয়া, 2 ছেপ্তেম্বৰঃ সোমবাৰে চাহ কৰ্মচাৰী সংঘৰ কেন্দ্ৰীয় সমিতিৰ নিৰ্দেশ মৰ্মে চাহ কৰ্মচাৰী সংঘৰ কুমচাং শাখাই কুমচাং চাহ বাগিছাৰ সন্মুখত ধৰ্ণা কাৰ্যসূচী ৰূপায়ণ কৰে ৷ পুৱা 6.30 বজাৰ পৰা 7 বজালৈ চাহ বাগিছাখনৰ সকলো কৰ্মচাৰী বাগিছাখনৰ মুখ্য পথৰ সন্মুখত ধৰ্ণা দিয়ে ৷
তেওঁলোকৰ অভিযোগ অনুসৰি পে স্কেল ৰিভাৰ্ছৰ মতে 25 মাৰ্চ 2016ৰ পৰা 31 মাৰ্চ 2018 লৈ হোৱা চুক্তিৰ ম্যাদ উকলি যোৱা 17 মাহ হ'ল যদিও তেতিয়াৰ স্কেলতে দৰমহা তথা সা-সুবিধা চলি আছে ৷ অসম চাহ কৰ্মচাৰী সংঘই ইতিমধ্যে যোৱা 29 আগষ্টত ৰাজ্যৰ সকলো চাহ বাগিচাৰ মালিক পক্ষক স্মাৰক পত্ৰৰ যোগেদি বিষয়টো অৱগত কৰিছিল যদিও কোনোধৰণৰ গুৰুত্ব নিদিয়াৰ অভিযোগ কৰে প্ৰতিবাদকাৰীসকলে ৷ সেয়ে অসম চাহ কৰ্মচাৰী সংঘই আজিৰে পৰা তিনিদিনীয়াকৈ এই আধা ঘন্টীয়া ধৰ্মঘট কাৰ্যসূচী ৰূপায়ণ কৰে ৷ উল্লেখ্য যে অহা 9 ছেপ্তেম্বৰৰ পৰা তেওঁলোকে তিনিদিনীয়াকৈ বিয়লি 4 বজাৰ পৰা 5 বজালৈ আকৌ আধা ঘন্টীয়া ধৰ্মঘট কাৰ্যসূচী ৰূপায়ণ কৰিব ৷ আনহাতে 16 ছেপ্তেম্বৰত পোষ্টাৰিং,17 ছেপ্তেম্বৰত কৰ্মবিৰতি আৰু 26 ছেপ্তেম্বৰত অবিৰত অনশন কাৰ্যসূচী লোৱা হ'ব বুলি তেওঁলোকে জানিবলৈ দিয়ে ৷ চাহ বাগিচাৰ মালিক পক্ষই অতীতৰে পৰা বাগিছা সমূহৰ কৰ্মচাৰী সকলক প্ৰৱঞ্চনা কৰি অহাৰ বাতৰি সৰ্বজনবিদিত ৷ পিচে চাহ কৰ্মচাৰী সকলৰ এই প্ৰতিবাদ মালিকপক্ষই কেনেদৰে গ্ৰহণ কৰে সেয়া লক্ষণীয় হ'ব ৷