ডুমডুমা, 9 এপ্ৰিল : শুকুৰবাৰে ডাঙৰীৰ ৭ নং ৰাষ্ট্ৰীয় ঘাইপথ অৱৰোধ কৰি ডাঙৰী আঞ্চলিক সদৌ অসম ছাত্ৰ সন্থা, নৱজ্যোতি যুৱ সংঘৰ যৌথ উদ্যোগত আৰু ডাঙৰী, ধাদুম অঞ্চলৰ স্থানীয় ৰাইজে পথ অৱৰোধ কৰি উত্তাল প্ৰতিবাদ সাব্যস্ত কৰে ৷ অইলৰ টেংকাৰৰ খুন্দাত নিহত হোৱা নিপ ঠাকুলিৰ পৰিয়ালক ১ কোটি টকাৰ ক্ষতিপূৰণ আৰু পৰিয়ালবৰ্গক অইল ইণ্ডিয়াত স্থায়ী নিযুক্তি দিয়াৰ দাবীত সংগঠনকেইটাই এই কাৰ্যসূচী গ্ৰহণ কৰে ৷
উল্লেখ্য যে, ২৯ মাৰ্চত অইল ইণ্ডিয়াৰ তেল পৰিবাহী এখন টেংকাৰৰ খুন্দাত নিপ ঠাকুলি নামৰ এজন লোক থিতাতে নিহত হৈছিল । এই ঘটনাৰ আজি ১২ দিন পাৰ হৈ যোৱাৰ পাছতো অইল ইণ্ডিয়া কৰ্তৃপক্ষই পৰিয়ালটোক কোনো ধৰণৰ ক্ষতিপূৰণ নিদিয়াৰ বাবে উত্তাল প্ৰতিবাদ সাব্যস্ত কৰি নিপ ঠাকুলিৰ পৰিয়ালক ১ কোটি টকাৰ ক্ষতিপূৰণ আৰু পৰিয়ালবৰ্গক অইল ইণ্ডিয়াত স্থায়ী নিযুক্তি দিয়াৰ দাবী জনায় । উল্লেখযোগ্য, পূৰ্বেও অইল কৰ্তৃপক্ষৰ লগত বিষয়টো লৈ দল-সংগঠনে আলোচনাত মিলিত হৈছিল যদিও অইল কৰ্তৃপক্ষই দাবী সমূহ মানি লোৱা নাছিল ৷
