বিষয় কেব: ৰাজ্যজুৰি অব্যাহত বিভিন্ন দলৰ প্ৰতিবাদী কাৰ্যসূচী

কেব প্ৰসংগত ক্ৰমে উত্তাল হৈ পৰিছে সমগ্ৰ ৰাজ্য,বিভিন্ন স্থানত কেবৰ বিৰোধিতাৰে বিভিন্ন দল-সংগঠনে প্ৰতিবাদী কাৰ্যসূচী গ্ৰহণ কৰে,ডুমডুমাত প্ৰতিবাদ সাব্যস্ত কৰে বীৰ লাচিত সেনাই,চামগুৰিত সদৌ অসম জাতীয়তাবাদী যুৱ ছাত্ৰ পৰিষদে প্ৰতীকী শৱদেহ দাহনেৰে এই বিধেয়কৰ বিৰোধিতা কৰে,ইপিনে ধনশিৰি মহকুমাৰ সৰুপথাৰতো ছাত্ৰ মুক্তি সংগ্ৰাম সমিতিয়ে স্থানীয় ৰাইজৰ সহযোগত জোঁৰ সমদল কাৰ্যসূচী গ্ৰহণ কৰে

নিউজ ডেস্ক, ১ ডিচেম্বৰ: কেব প্ৰসংগত ক্ৰমে উত্তাল হৈ পৰিছে সমগ্ৰ ৰাজ্য ৷ ৰাজ্যৰ বিভিন্ন স্থানত কেবৰ বিৰোধিতাৰে বিভিন্ন দল-সংগঠনে প্ৰতিবাদী কাৰ্যসূচী গ্ৰহণ কৰে ৷ ডুমডুমাত দেওবাৰে প্ৰধানমন্ত্ৰী নৰেন্দ্ৰ মোডী আৰু গৃহমন্ত্ৰী অমিত শ্বাহৰ প্ৰতিকৃতি দাহ কৰি প্ৰতিবাদ সাব্যস্ত কৰে বীৰ লাচিত সেনাই ৷ ডুমডুমাস্থিত বীৰ লাচিত সেনাৰ আঞ্চলিক সমিতিয়ে গান্ধী প্ৰতিমূৰ্তিৰ সন্মুখত এই প্ৰতিবাদ সাব্যস্ত কৰে ৷ সংগঠনটোৱে নাগৰিকত্ব সংশোধনী বিধেয়ক ২০১৬ বাতিল,দেশৰ অৰ্থনৈতিক দুৰৱস্থাৰ দূৰীকৰণ আৰু ডাঃ প্ৰিয়ংকা ৰেড্ডীৰ ধৰ্ষণকাৰীক উপযুক্ত শাস্তিৰ দাবী তুলি এই কাৰ্যসূচী হাতত লয় ৷ ‘নাগৰিকত্ব সংশোধনী বিধেয়ক বাতিল কৰক,নৰেন্দ্ৰ মোডী মুৰ্দাবাদ,অমিত শ্বাহ হুঁচিয়াৰ,বীৰ লাচিত সেনা জিন্দাবাদ ইত্যাদি শ্ল'গানেৰে প্ৰতিবাদ সাব্যস্ত কৰে প্ৰতিবাদকাৰী সকলে ৷

সমান্তৰালকৈ নগাঁৱৰ চামগুৰিত সদৌ অসম জাতীয়তাবাদী যুৱ ছাত্ৰ পৰিষদে মুখ্যমন্ত্ৰী সৰ্বানন্দ সোণোৱালৰ প্ৰতীকী শৱদেহ দাহনেৰে বিধেয়কখনৰ বিৰোধিতা কৰে ৷ প্ৰতিবাদকাৰী সকলে মুখ্যমন্ত্ৰী সোণোৱাল গ’বেক,হিমন্ত বিশ্ব শৰ্মা গ’বেক আদি বিভিন্ন শ্ল'গানেৰে প্ৰতিবাদ সাব্যস্ত কৰে। তদুপৰি ভৱিষ্যতেও নাগৰিকত্ব সংশোধনী বিধেয়কৰ বিৰোধিতা কৰি যাব বুলি বিজেপি চৰকাৰক সকীয়নি প্ৰদান কৰে ৷

ইপিনে ধনশিৰি মহকুমাৰ সৰুপথাৰতো ছাত্ৰমুক্তি সংগ্ৰাম সমিতিয়ে স্থানীয় ৰাইজৰ সহযোগত নাগৰিকত্ব সংশোধনী বিধেয়ক বাতিলৰ দাবীত জোঁৰ সমদল কাৰ্যসূচী গ্ৰহণ কৰে ৷ অসমে কোনো কাৰণতে ১৯৭১ চনৰ পিছত অহা অবৈধ বাংলাদেশীৰ বোজা গ্ৰহণ নকৰে বুলি মন্তব্য কৰে প্ৰতিবাদকাৰীসকলে ৷ যদি এই বিধেয়ক গৃহীত হয় তেন্তে মুখ্যমন্ত্ৰী সোণোৱাল আৰু অসম চৰকাৰ দায়ী হব বুলিও হুংকাৰ প্ৰদান কৰে ছাত্ৰ মুক্তি সংগ্ৰাম সমিতিয়ে ।

লগতে চাওক:ডা৹ মৃগাংক তালুকদাৰ নলবাৰী জিলা বিজেপিৰ নতুন সভাপতি