Bihar train accident: বিহাৰৰ ৰে’ল দুৰ্ঘটনাত মৃত্যু শদিয়াৰ মাতৃ-কন্যাৰ

বিহাৰৰ বক্সাৰত সংঘটিত ভয়ংকৰ ৰে’ল দুৰ্ঘটনাত নিহত শদিয়া উদয় নগৰৰ ঊষা ভাণ্ডাৰী আৰু কন্যা আকৃতি ভাণ্ডাৰী । ঊষাৰ মৃত্যুক লৈ সমগ্ৰ ঘৰখনত বিৰাজ কৰিছে শোকাকুল পৰিবেশে ৷ এতিয়াও পৰিয়ালৰ লোকে মানি ল’ব পৰা নাই দুয়োৰে অকাল মৃত্যুক ৷

তিনিচুকীয়া, ১২ অক্টোবৰ: বুধবাৰে নিশা বিহাৰৰ বক্সাৰত সংঘটিত ভয়ংকৰ ৰে’ল দুৰ্ঘটনাত নিহত যাত্ৰীসকলৰ দুগৰাকী অসমৰ তিনিচুকীয়া জিলাৰ । তেওঁলোক শদিয়া উদয় নগৰৰ কন্যা ঊষা ভাণ্ডাৰী (৩৩) আৰু তেওঁৰ কন্যা আকৃতি ভাণ্ডাৰী (৮) । আনহাতে পৰিয়ালটোৰ বাকী দুগৰাকী সদস্য গুৰুতৰভাৱে আঘাতপ্ৰাপ্ত হয় । গুৰুতৰভাৱে আঘাতপ্ৰাপ্ত দুজন ঊষা ভাণ্ডাৰীৰ স্বামী দীপক ভাণ্ডাৰী আৰু আন এগৰাকী যমজ কন্যা আদিতী ভাণ্ডাৰী (৮) ৷

বিহাৰৰ ৰে’ল দুৰ্ঘটনাত মৃত্যু শদিয়াৰ মাতৃ-কন্যাৰ

ঊষাৰ শদিয়াস্থিত বাসগৃহত আজি পুৱা এই বাতৰি আহি পোৱাৰ পাচত সমগ্ৰ ঘৰখনত এক শোকাকুল পৰিবেশৰ সৃষ্টি হয় ৷ কান্দোনত ভাঙি পৰে পৰিয়ালৰ লোক ৷ ঊষা ভাণ্ডাৰীৰ পৰিয়ালে সদৰী কৰা অনুসৰি, আজি পুৱা ৬ বজাত তেওঁলোকে দুৰ্ঘটনা সংঘটিত হোৱাৰ খবৰ লাভ কৰে ৷ নিশা প্ৰায় ২১.৩৫ বজাত সংঘটিত হৈছিল ৰে’ল দুৰ্ঘটনাটো আৰু ৰে’লত উঠাৰ পূৰ্বে তেওঁলোকে ফোনত কথা পাতিছিল ঊষা ভাণ্ডাৰীৰ স্বামী দীপক ভাণ্ডাৰীৰ সৈতে ৷

বিহাৰৰ ৰে’ল দুৰ্ঘটনাত মৃত্যু শদিয়াৰ মাতৃ-কন্যাৰ

ঊষা ভাণ্ডাৰী ন বছৰৰ পূৰ্বে শদিয়াৰ পৰা নেপাললৈ বিয়া হৈছিল যদিও তেওঁলোকে কৰ্মসূত্ৰে দিল্লীত থাকে ৷ বুধবাৰে দিল্লীৰ পৰা নেপাললৈ ৰে’লৰ জৰিয়তে যাত্ৰা কৰাৰ সময়তে সংঘটিত হৈছিল এই দুৰ্ঘটনাটো । আগন্তুক দুৰ্গা পূজাত নেপালৰ পৰা শদিয়াৰ মাতৃৰ ঘৰলৈ অহাৰ কথা আছিল পৰিয়ালটো ৷

দীৰ্ঘদিনৰ পাচত জীয়াৰী ঘৰলৈ আগমণক লৈ সমগ্ৰ ঘৰখনত উৎসৱমুখৰ পৰিবেশে বিৰাজ কৰিছিল ৷ কিন্তু এতিয়া যে আৰু কোনোদিনেই ঘৰলৈ উভতি নাহে ঊষা আৰু আকৃতি ৷ এই সত্য যেন মানি ল’ব পৰা নাই ঊষাৰ পৰিয়ালৰ লোকে ৷ সকলোৱে এতিয়াও আশাৰে চাইছে পদূলিমুখলৈ ৷

লগতে পঢ়ক:Bihar Train Accident: অসম অভিমুখী নৰ্থ ইষ্ট এক্সপ্ৰেছ দুৰ্ঘটনাগ্ৰস্ত, নিহত-৪, আহত অৰ্ধ শতাধিক