ফেচবুক প’ষ্টৰ ভিত্তিত নামদাঙত আৰক্ষীৰ তীব্ৰ অভিযান

অবৈধ ভাৱে কয়লা খনন কৰিবলৈ গৈ মাৰ্ঘেৰিটাৰ নামদাঙত এজন লোকৰ মৃত্য়ু হোৱা বুলি ফেচবুকত প্ৰকাশ হোৱাৰ পাচতেই আৰক্ষীৰ অভিযান ৷

মাৰ্ঘেৰিটা, 22 অক্টোবৰ: অসম-অৰুণাচল সীমান্তৱৰ্তী মাৰ্ঘেৰিটাৰ নামদাং অঞ্চলত অবৈধভাৱে কয়লা খনন কৰিবলৈ গৈ এজন লোকৰ মৃত্যু হোৱা বুলি ফেচবুকত প্ৰকাশ পোৱাৰ পাচতেই মাৰ্ঘৰিটা আৰক্ষীৰ তীব্ৰ অভিযান চলে মঙলবাৰে ৷ মাৰ্ঘেৰিটা আৰু পাটকাই পাহাৰত ৰেড হল মাইনিংৰ জৰিয়তে কয়লা খনন আৰু সৰবৰাহৰ অভিযোগে ৰাজ্যত তোলপাৰ লগাই থকা সময়তে নামদাঙৰ দুৰ্গম অঞ্চলত অবৈধ ভাৱে কয়লা খনন কৰিবলৈ গৈ এজন শ্ৰমিক মৃত্যমুখত পৰা বুলি অভিযোগ উত্থাপন হৈছিল। মাৰ্ঘেৰিটা কংগ্ৰেছ নামৰ একাউণ্টৰ পৰা Facebookত প’ষ্ট শ্বেয়াৰ কৰি এই অবৈধ খনন কাৰ্যৰ লগতে অৰুপ পাল,মুনা আহমেদ আদি জড়িত বুলি প্ৰকাশ কৰা হৈছিল।

এই প’ষ্টৰ পিচতেই মঙলবাৰে পুৱাৰে পৰা অসম-অৰুণাচল সীমান্তৱৰ্তী দুৰ্গম নামদাং অঞ্চলকে ধৰি অৰুণাচলৰ আৰধাৰাত মাৰ্ঘেৰিটা আৰক্ষীয়ে অভিযান চলায় ৷ এই অভিযানত তেনে কোনো ধৰণৰ ঘটনা ঘটাৰ তথ্য লাভ নকৰে আৰক্ষীয়ে। অৱশ্যে এনেধৰণে অবৈধ ভাৱে কয়লা খনন আৰু সংগ্ৰহ কৰিবলৈ গৈ শ্ৰমিকৰ মৃত্যু হোৱাৰ ঘটনা নতুন কথা নহয়। সুদীৰ্ঘ বহু বছৰৰ পৰাই পাটকাই পৰ্বতৰ বিভিন্ন স্থানত অসাধু ব্যৱসায়ীয়ে গঢ়ি তোলা অবৈধ আণ্ডাৰগ্ৰাউণ্ড মাইনিঙত কয়লা খনন আৰু সংগ্ৰহ কৰিবলৈ গৈ বহু সাধাৰণ শ্ৰমিকে প্ৰাণ হেৰুৱাবলগীয়া হৈছে। এতিয়া কংগ্ৰেছৰ এই প’ষ্টটোৰ বিৰুদ্ধে অৰুপ পাল নামৰ ব্যৱসায়ীজনে আইনৰ কাষ চাপিব বুলি জানিব পৰা গৈছে ৷

• লগতে চাওক-পৰ্যটনৰ বাবে মুকলি কৰা হল চিয়াচেন